Ïasnot kti ka KSU bad ka tnad pulit ban pynsngewthuh shaphang ki jingeh na u Drug

Jowai, Jylliew 29: Ka Khasi Students’ Union (KSU) War Jaiñtia Circle lem bad ka tnad pulit jong ka Amlarem Police Station ki la pynlong ïa ka program ban kiar na ki jingdih pynbuaid khamtam na u Drugs halor ka phang ‘Say No to Drugs, Yes to Life’ ha ka 27 tarik mynta u bnai ha ïew Amlarem.
Kane ka program ka long shi bynta ban rat diengkhong ïa ki kam kiba ïadei bad u drugs khnang ba ki khynnah Samla ka thaiñ War Jaiñtia kin lait na ka jingdih ne pyndonkam ïa u drugs. Ha kane ka program la ïadon ryngkat u Magistrate jong ka Civil Sub-Division, ki nongïalam ka Synjuk Waheh Shnong ka thaiñ War.
Haka jingai jingkren naka liang u Officer Incharge ka Amlarem Police Station ula kyntu jur ïa ki khun samla ka thaiñ ba kim dei ban ngop ha une u jait jingdih ba pynjot ïaka lawei ki khun samla bad ïaka thaiñ hi baroh kawei
Ula ai ka jingkyntu ïa ki bor shnong ki sengbhalang ban ïatreilang ban rat dingkhong kum kine ki jaid jingdih, u kyntu ruh ïa ki khun samla ka thaiñ ba kin long kiba husiar bha, la kyntu ruh ïaki kmie ki kpa ba kin long kiba adkar ïala ki khun bad ba kin nang ban ieid da kana ai por shibun bad la ki khun.
Kiwei de kiba kren ha kane ka jingïalang ki la kyntu ïa baroh ki khun samla ka thaiñ War Jaiñtia ba kin ïaid ha ka lynti kaba khuid ba suba bad ban burom ïa ki riew Rangbah khnang ba kum ki samla kin kiew ha ki liang baroh.
Katba na ka liang ka Seng la ai jingkren da u Publicity Secretary Samla Platini Mukhim uba la pynsngew ba ka seng ka kloi ban ai ka kti ka mon ka kti ka diang ban ïatreilang bad ki bor sorkar, ki nongïalam shnong na ka bynta ka kam ba bha bad ka lawei jong ka jaitbynriew.