Jowai, Ïaïong 26: Ki paidbah nongshong shnong jong ka sor Jowai kumjuh ki shnong ba marjan kila ïasnohkti lang mynta ka sngi naduh ka por 6 baje mynstep ba la sdang pyntreikam ïa ka jingkhot pakhang shnong ba 36 kynta jong ka Dorbar Shnong Tympang Iawmusiang.
La sakhi ba kane ka pakhang shnong kala long kaba ïaid beit, ïaid ryntih khlem da don kino kino ki jinghuri hura, la sakhi ruh ïa ki lynti ki synkieng ha Iawmusiang kila kynjah jar jar bad ki ïew ki hat kila thylli lut, wat ki kali ki mator ym shem la don shuh kiba ïaid ba ïeng.
Ha Iawmusiang ki bynta jong ka ïaw shyiap, ïaw Seiñ Raij, ïaw chor bad ka ïaw thymme kila khang khyrdep lut, la sakhi tang ïa ki volunteer jong ka DS Tympang kiba kynthup ïa ki seng longkmie, ki khun samla lem bad ki nongïalam shnong kumjuh ki Volunteer na ka Chutwakhu, Ladthalaboh kiba shim bynta ban khang lad ïa ka rung ka mit sha ki bynta ka Ïawmusiang.
Ki jaka ba la ap pahara ki kynthup hajan H.K Singh SS, ha lad Riat Sasim surok ba leit sha Amlarem, ha lad Wah Nongbah, lad pohskur, ha Police Point bad ha lad Kiang Nangbah, ïa kito ki kali kiba wan na ki thaiñ Mihmyntdu la khang ban rung sha Ladthalaboh bad pynïaid da surok By-Pass ban mih sha surok Shillong. Ki don ruh ki kali Tourist kila hap ban sangeh noh hajan ophis DTO Jowai.
Kiba bun na ki Dorbar Shnong ba marjan bad ka Iawmusiang kila ai ka jingkyrshan pura ïa kane ka jingkhong pakhang shnong ba 36 kynta, kynthup da ïa Ladthalaboh Dorbar Pyllun bad ka Chutwakhu Social Welfare Local Dorbar bad kiwei de.
Wat ki skul kiba don hapoh ka Iawmusiang kila khang lut lait noh tang ki Bank bad ki ophis sorkar, ki don ruh ki skul hapoh ka sor Jowai kiba la hap ban pynsangeh ïa ka jingpynlong skul bad la phah pynphai noh ïa ki khynnah skul.
Ïa kane ka pakhang shnong yn pynkut lashai ka sngi 27 tarik ha ka por 6 baje janmiet, shuh shuh ka Dorbar shnong ka khot ïa ka jingïatreilang jong baroh ki nongshong shnong jong ka District hi baroh kawei, ba kin bteng ka jingïasnohkti lang haduh lashai ka sngi khnang ba katei ka jingthmu kan long kaba jop khlem da don kino kino ki jingklumar.
Kumban shu pynkynmaw ba kane ka jingkhot pakhang shnong ba 36 kynta ka long shi bynta kum ka dak ban pyni sha ka sorkar halor ka jingdkot ka rukom triekam jong ka namar haduh mynta ka sorkar kam pat lah ban pynkhuid lut ïa baroh ki ñiut ba sahkut ha sor Jowai hadien ba ka DS kala dep ban ai por khadduh lai sngi lyngba ka dorkhas ha u Deputy Commissioner ban leh ïa kaba donkam.
Ha kane ka pakhang la shah ban ïait tang ïa kito ki kali Emergency, ki dukan dawai, ki nongtrei ka koit ka khiah, ki nongpynpoi dud, tyndong lyer bad ki lad pathai khubor.
