Shillong, Nailur 25: Ka Central Bureau of Communication, Shillong ka la pynlong ïa ka prokram “Swachhata Hi Seva” mynta ka sngi ha Garo Union Higher Secondary School, Shillong da kaba pynïasohlang ïa ka jingkhuid jingsuba, ka jingsngewthuh ïa ki kam ba ïadei bad ka mariang bad ka jingïatreilang bad ki khynnah pule.
Ka skul kaba la pawnam ha kaba pynmih ïa ki riewdonsap ha ka kam ïalehkai ha ka distrik bad ka jylla, ka la sakhi ïa ka jingïashim bynta shitrhem ha ki jingïakop Art bad Sports Quiz. Ka quiz, kaba la saiñdur ha ka phang jong ka kam ïalehkai, ha kaba ki khynnah skul ki la pyni ïa ka jingstad jong ki. La pynkup burom ïa ki nongjop da ki khusnam bad ki syrnot ban pynshlur ïa ka jingpule bad ka jingtreilang jong ki.
Kum shi bynta ka campaign ha baroh kawei ka ri “Ek Din Ek Ghanta Ek Saath: Voluntary Shramdhaan”, ki khynnah skul, ki nonghikai bad ki ophisar ki la ïasnoh kti lang ha ka prokram jingpynkhuid ha kylleng ki jaka jong ka skul. Hadien kane la pynbud da ka jngthung dieng hapoh ka “Ek Ped Maa Ke Naam”, ha kaba ki khynnah skul ki la thung ïa ki tynrai dieng ba la aiti sha ki kmie jong ki, kaba long ka dak jong ka jingsumar ïa ka longïing bad ka mariang.
U Bah Wompher Shadap, Capacity Building Specialist, SBM-U, tnat Kam Pynroi Sor, u la kren shaphang ki bynta bapher bapher jong ka campaign Swachhata Hi Seva bad u la pynpaw ïa ki kam bapher bapher ba la pyntreikam da ka tnat jong u kum shi bynta ka sienjam bad kum ka rukom treikam kaba man ka por. U la batai kumno ka rukom lehkhuid bad pynkhuid ka la nang kiew ha kine ki por ba la leit noh namar ka jingïashim bynta shitrhem jong ki paidbah, ka sorkar bad kito kiba don bynta ha kane ka kam. U la ban jur ba ka Swachhata kam dei tang ka kam kaba shisngi hynrei ka dei ka jingpyrshang kaba ïai bteng, kaba pynshlur ïa ki khynnah pule ba kin sngew sarong ban pynneh pynsah ïa ka jingkhuid jingsuba ha ki sawdong sawkun jong ki bad ban long kum ki nongkit khubor jong ka jingkylla ha ki shnong ki thaw jong ki.
Ka Kong O. Sumer, District Health Education Officer, EKHD ka la ai jingkren sha ki samla pule halor ka jingdonkam jong ka jingbam kaba tei met. Ka la batai ba ka jingbam kaba biang kaba dap kyrhai ki protein, ki vitamin, bad ki mineral ka long kaba donkam bha na ka bynta ka jingheh jingsan, ka bor ïaleh pyrshah bad ka jinglah ban pule. Ka la pynshlur ïa ki samla pule ban bam man ka por ïa ki jingbam kiba tei met, ban kynthup ïa ki soh bad ki jhur ha ka jingbam jong ki, bad ban dih ïa ka um kaba khuid. Ka la pynlong ïa ka jingïalang ïamir jingmut ha kaba ki samla pule ki la jer kyrteng ïa ki jingbam kiba tei met kiba ki lah ban kynthup ha ki jingbam jong ki bad ka la pynkut da kaba kyntu ïa ki ban bam smai ban pynneh ïa ki jingmlien kiba bha bad ban kyntiew ïa ka rukom bam kaba kyntiew ïa ka koit ka khiah hapdeng ki paralok.
Ha kane ka prokram la wan ban ïashim bynta da u Ashok Kumar, Vice Principal, u L. Thapa, Assistant Teacher, Karnesh S. Sangma, Nonghikai Sports ryngkat kiwei pat ki nonghikai jong kane ka skul, kiba la pynshlur ïa ki khynnah skul ban ïashim bynta shitrhem ha baroh ki kam bad ai ruh ka jingïaroh ïa ka CBC Shillong kaba la pynlong ïa kane ka prokram.
Ki bor pynïaid skul ki la ïaroh ïa kane ka prokram, da kaba ong ba ka jingpynïasoh lang ïa ki jingïakop, ki kam pynkhuid, bad ki jingïakren ai jingtip ka la wanrah ïa ka jinghikai kaba pura. Ki la pynpaw ka jingsngewnguh ïa ka CBC Shillong kaba la pynlong ïa kum kine ki sienjam kiba kyntiew ïa ka jingsngewthuh bad kiba wanrah ïa ka jinglong ryntih ka jingbah khlieh bad ka jingai jingshakri ïa ka imlang sahlang.
