Ïashimbynta shitrhem ki heprit ha ka Khristmas Carol ka Balang Presbyterian Mawkhar

Shillong, Nohprah 19: Da ki spah ngut ki heprit jong ka Junior CE Society, ka Balang Presbyterian Mawkhar ha ka sngi Thohdieng ki la ïashim bynta ha ka jingpynlong ïa ka jingïaid Carol Khrismas kum ka dak ka pyndonburom ïa u Jisu Khrist bad kumjuh ruh kum ka dak ka jingpynkhreh ïa ka jingwan long briew jong u Khrist ha ka sngi Khrismas ka ban sa long ha ka 25 tarik mynta u bnai ha kaba na ka liang ka Balang ruh ka la pynkhreh bha ban rakhe ïa kane ka sngi kaba kyrpang.
Ha kane ka sngi ki heprit kiba la riam ha ki jait jingriam bapher bapher ki la mih na phyllaw Ïingmane da ka jingïalam jong u phadar Khrismas ne Santa Claus uba ha lynti lynti u la sam ruh da ki mit mit sha ki hep kiba rit bad kumjuh ruh sha kiba la heh la san bad kiwei kiwei.
Kane ka jingïaid Khrismas Carol ka la sdang na phyllaw Ïingmane, nangta la ïaid sha Motphran, nangta sha Umsohsun, Mawkhar nangta sha Mission Compound bad la pynkut pat ha madan student Jaïaw Pdeng.
Ha kane ka prokram la ïohi ki heprit, ryngkat ki samla bad kiba la rangbah, kynthei bad shynrang jong ka Balang haba ki ïaid ïa kane ka khrismas Carol ki la rwai shitrhem ïa ki jingrwai Khrismas bad ki paidbah, naduh ki nongdie dukan bad ki nongthied ruh kumjuh ha lynti ïaid ki la ïa shim bynta lang ban rwai ïa ki jingrwai Khrismas bapher bapher ba kynthup ïa ka jingrwai Jingle bells, feliznavidad, we wish you a merry Christmas bad kiwei kiwei pat ki jingrwai jong ka Balang.
Ïa ki heprit la synran lang da ki nongïalam jong ka Balang naduh ba sdang haduh ban da poi ha ka jaka ba pynkut ïa kane ka jingïaid Christmas Carol bad ha kane ka jaka ruh ki la ïa rwai shitrhem ban pyndon burom ïa u Jisu Khrist.