Jowai, Rymphang 06: Ka Pariksha Pe Charcha kadei ka prokram kyrpang jong ka Sorkar India lyngba ka Ministry of Education, ha kaba u Prime Minister ka Ri, u Narendra Modi u ïakren markhmat bad ki khynnah skul, da kaba sneng ba kraw bad aibuit ai mynsien ïa ki khynnah shaphang kumno ban long kiba jop ha ka jingïaid lynti jong ka jingim bad ruh ban poi sha ka thong ha ka pule ka puthi.
Kumba long ha kylleng ki District ka Ri India ha kane ka 6 tarik Rymphang, 2026 ki khynnah skul ha West Jaiñtia Hills District ruh ki la ïashim bynta ban sakhi ïa ka 9th Edition Pariksha Pe Charcha 2026 ba la pynlong ha Dorbar Hall ka Loompyrdi Iongpiah, da ka jingïatreilang hapdeng ka District Mission Coordinator, SSA bad ka District School Education Officer, West Jaiñtia Hills.
Na ka liang ki khynnah skul hadien ba la kut ka jing ïakren u Prime Minister, ki la ïoh lad pat ban ïashim bynta ban ai jingkren halor ka jingshem bad ka jingmyntoi ba ki ïoh na kane ka prokram bad ki da pynpaw ruh ka jingsngewkmen haba ki ïohlad ban sakhi ïa kane ka prokram kaba long shisha ka prokram kaba ai jingmyntoi ïa ki khamtam ha ka jingïadei bad ka pule puthi bad ruh ha ka ban long ki khynnah kiba lah ban ïaleh pyrshah ïa ki jingeh kiba long ki mawjynthut ha ka jingïaid lynti ka jingim jong ki.
Khatduh shwa ban pynkut ïa kane ka prokram, ka Ioomiatmon Dkhar, Teacher Seiñraij Higher Secondary School, Jowai ka la pashat ki kyntien ai mynsien ïa ki khynnah skul.
