Ïashimbynta haduh 61 ngut ki Lamphang hapoh ka CSPOC kaba naduh ka 14 haduh ka 16 tarik
Shillong, K’ Lyngkot 17: U Lamphang ka Ïing Dorbar Thaw aiñ ka jylla Meghalaya Legislative Assembly, u Thomas A. Sangma, u la leit ban ïa shim bynta ha ka 28th Conference of Speakers and Presiding Officers of the Commonwealth (CSPOC), 2026, ba la khot pynlong da ka Parliament ka India naduh ka 14 haduh ka 16 tarik mynta u bnai, 2026.
Ïa kane ka jingïalang la wan ruh ban shim bynta da u Secretary, Meghalaya Legislative Assembly, u Malthus S. Sangma, kaba pynpaw ïa ka jinglong kloi jong ka Ïing Dorbar Thaw aiñ ban ïashim bynta ha ka parliament jong ki ri ka pyrthei da ka jingthmu ban pynkhlaiñ ïa ka riti synshar khaddar bad ki kam thaw aiñ kane ka juk mynta.
Ïa ka high-level Conference la wan ban plie da u Myntri Rangbahduh ka ri u Narendra Modi ha ka jingïalang kaba la pynlong ha Central Hall ka Samvidhan Sadan. Ha ka jingwan poi jong u, la pdiang sngew bha da u Lamphang ka Ïing Dorbar ka ri u Om Birla, External Affairs Minister u S. Jaishankar, bad Deputy Chairman, Rajya Sabha u Harivansh Narayan Singh.
Ïa ka jingïalang kaba 28th ka CSPOC la pynïaid da u Lamphang ka Lok Sabha u Om Birla ha kaba la shim bynta haduh 61 ngut ki Speaker bad Presiding Officer na ki 42 tylli ki Commonwealth country, ha ryngkat ka jingïashim bynta na ki 4 tylli ki semi-autonomous parliament, ha kane ka jingïalang kaba kongsan bad kaba donkam.
Ha ka jingïalang la ïakren halor ki kam jong ka rukom pynïaid dorbar, ka bynta ki Lamphang bad ki Presiding Officer, ki rukom treikam thymmai ka parliament ban ïarap ïa ki nongshong shnong da ki jingtip ka riti synshar paidbah bad kiwei.
Ki mat kiba kongsan kidei ‘AI in Parliament: Balancing Innovation, Oversight and Adaptation”, “Social Media and its Impact on Parliamentarians”, nalor ka jingïashim bynta ha ki kam thep vote.
Kham hashwa u Lamphang ka Lok Sabha u Om Birla u la pynïaid ka jingïalang ka Standing Committee meeting hashwa ban sdang ka 28th CSPOC.
Ïa ka 27th edition jong ka CSPOC la khot pynlong da ka Uganda ha u Kyllalyngkot 2024, bad ka India ka shim ka jingkitkhlieh ban pynlong ïa kane ka jingïalang mynta u snem 2026.