Ïashimbynta 150 ngut ha ka marathon jong ka 2nd Ranikor Constituency Week 2025-26 jong ka SBSA

Mawkyrwat, Kyllalyngkot 16: Kum shibynta ban kyntiew ïa ki kam sports bad ki sap jong ki samla kiba hapoh jong ka Ranikor Constituency, ka Southern Border Sports Association ka la ïoh ban sdang ïa ka 2nd Ranikor Constituency Week 2025 – ’26 mynta ka sngi da ka jingïalehkai marathon ha kaba ki la don haduh 150 ngut ki nongïashimbynta.
Ïa kane ka marathon, la plie mynta ka sngi ka 15 tarik u Kyllalyngkot, 2026 da u bah Pius Marweiñ, MLA ka Ranikor Constituency uba dei ruh ha ka juh ka por kum u kongsan.
Ki nongjop ha kane ka marathon ki long ha ka kyrdan jong ki samla rangbah la jop da u samla Finalbonson Syiemlieh, haba ïa dei bad ki kynthei pat la jop da ka samla Banpynshai Syiemlieh. Nangta, haba ïa dei bad ki samla rit jong ki shynrang la ïoh rah da u heprit Johnfarban Mawlien bad jong ki kynthei pat la ïoh rah da i heprit Kyntiewdor Thongni.