Mawkyrwat, ‘Nailar, 13: Ka ophis jong u District Sports Officer, South West Khasi Hills District ha ryngkat ka District Level Committee jong ka District Promotion Society, South West Khasi Hills District, Mawkyrwat mynta ka sngi ka la pynlong ïa ka jingïamarehthong ka ‘Independence Day Run 2022’ kaba 12 kms ha Mawkyrwat kaba la sdang bad pynkut hi hapoh jong ka madan jong ka Maharam Government Higher Secondary School, Mawkyrwat.
Kane ka jingïamareh thong ka dei kum shibynta jong ka jingrakhe ïa ka Azadi Ka Amrit Mahotsav (AKAM) jong ka jingdap 75 snem ka jingioh laitluid jong ka Ri India ha kaba u bah W. Biam, Additional Deputy Commissioner, South West Khasi Hills District u la long kum u kongsan.
Ha kane ka jingïamareh thong ba la pynlong da u District Sports Officer, South West Khasi Hills District ka la long kaba ïaid beit ïaid ryntieh ha kaba kumba 300 ngut ei ei ki nongmareh ki la wan ban ïashimbynta ba kynthup naduh ki ki hep kiba rit, ki samla shynrang bad kynthei, bad kumjuh ruh ki Rangbah ryngkat ki longkmie bad kynthup ïa u bah Swonding Mawlong, bah Tlanding Wahlang bad ka kong Kmoin Wahlang.
Ki nongjop ha ka jingïamareh na ka liang jong ki shynrang ki long u Hepstarly Lyngkhoi na Mawthawpdah (00:37:58), u Wobeststar Ramsiej (00:38:56) bad Iwelljohn Ramsiej (00:40:03) kine ki dei na Sakwang. Katba na ka liang ki kynthei pat ka kong Kyntimon Marweiñ na Mawlangwir (00:48:11), ka Lyntijingkmen Kharjahrin (00:50:07) bad ka Marqueenless Ramsiej (00:51:08) kine ki ruh ki dei na Sakwang.
Nangta, ki consolation prize ki long u bah Swonding Mawlong, i hep rit Banshemphang Shangdiar, i hep rit Bankitbok Ramsiej bad i hep rit Rockbanstar Lyngkhoi kiba dei jong ki shynrang. Jong ki kynthei pat ka kong Kmoin Wahlang, i hep rit Ibapynkmen Thongni, i hep rit Badapjingshai Kharjahrin, i hep rit Teilyntishisha Ramsiej bad i hep rit Rikynti Kharjahrin.
Ha kane ka sngi la ïoh ka jingkren lyngkot na u bah Damang Syngkon, District Sports Officer, South West Khasi Hills District, u bah W. Biam ADC, South West Khasi Hills District uba la kaweh ïa ka lama na ka bynta ki shynrang, bad u bah L.K. Tariang, ADC, South West Khasi Hills District uba la kaweh ïa ka lama na ka bynta ki kynthei ha ryngkat ka jingsakhi lang jong ki kmie ki kpa jong ki khynnah kiba la wan ïa shim bynta.
