Shillong, Risaw: Ban pynpaw ïa ka jingdon mynsiem ban tei ïa ka imlang ka sahlang bad ban pynneh pynsah ïa ka jingkhuid jong ka mei mariang na ka liang ka Yes Earth Youth Corps bad ka Rotary Club Shillong Heritage ki la ïashim bynta ban pynkhuid ïa ka wah Umshyrphi ha kane ka sngi Saitjaiñ ba la lah.
Ha kane ka prokram la wan ïasnohkti lang ruh da ki dkhot ka National Cadet Corps (NCC), Rotary District 3240 bad ka Shillong Municipal Board ha kaba la sakhi ruh ïa ka jingkylla ïa ka jinglong jingman jong kane ka wah Umshyrpi.
La sdang ia kane ka jingpynkhuid lyngba ka jingkaweh lama da ka Kong R.M. Kurba, Deputy Commissioner ka East Khasi Hills. Haduh palat 100 ngut ki dkhot ka NCC cadets, ki dkhot ka Rotary Club, ki heh bad ki staff ka Shillong Municipal Board nalor ki nongshong shnong jong katei ka jaka ki la ïashim bynta shitrhem ha kane ka jingpynkhuid ïa kane ka wah Umshyrpi.
Na ka liang ka DC ka EKHD ka la pyrto halor kane ka sienjam da kaba ong; “Ka jingpynkhuid ïa kane ka wah ka pynpaw halor ka bor jong ka jingïatreilang hapdeng ki nongshong shnong.Ka jingkut jingmut ka jong ngi ban pynneh pynsah ia ki tyllong um ka dang ïai bteng.Ka jingjop lyngba kane ka sienjam ym tang ba kan pynmyntoi tang ïa ngi mynta hynrei kan pynthikna ruh ïa ka jingkhuid bad ïa ka mariang kaba koit ba khiah na ka bynta ki pateng ki ban wan.”
Kumjuh na ka liang u Abhijit Sharma uba dei u Mission Director ka YesEarth Youth Corps ruh u la pynpaw ka jingsngew sarong halor kaei kaba ki la ïoh kheit lyngba ka jingpynkhuid ïa kane ka wah na ka bynta ban ïada ïa ka mei mariang.U pynpaw ruh ka jingkyrmen ban pynïaid shakhmat ïa kane ka jingjop bad ban bteng ïa ka thong ban ïada ïa ki um ki wah bad ki jingdon jingem jong ka mariang.
Kiwei pat kiba la aijingkren ki kynthup ïa u Hemen Kalita, Vice President bad Jasbir Singh Secretary ka Rotary Club Shillong Heritage kiba la ïai ban ba ka Club ka don ïa ka thong ban aijingkyrshan halor baroh ki sienjam ki thmu ban wanrah ïa ka jingkylla hapoh ka imlang ka sahlang hi baroh kawei.
