Khliehriat, Nailar 13: Ka Star Public School Lumshnong ka la ïashim bynta ha ka ‘Mega Tinkering Day’ ba la pynlong ha baroh kawei ka ri ïa kaba la khot pynlong da ka Tnad School Education & Literacy, Ministry of Education ha ryngkat ka jingïatreilang bad ka Atal Innovation Mission (AIM), NITI Aayog.
Ïa kane ka prokram la pynlong ha ka 12 tarik Nailar naduh ka por 10 haduh ka por 11 baje mynstep ha Atal Tinkering Lab jong ka skul.
Ki khynnah skul ba la jied ryngkat bad ki nonghikai ki la ïashim bynta ha ka live prokram “Build Together” ha kaba ki la trei ha ki kynhun ban shna ïa ki project bathymmai da kaba pyndonkam ïa ki tiar jong ka ATL. Ka prokram ka la pynshlur ïa ka jingpule bniah da ka kti, ka jingpynwandur, bad ki buit ban pynbeit ïa ki jingeh.
Haba kren shaphang kane ka jingthmu, u Principal jong ka Star Public School Lumshnong, u K. Dilip Kumar u la ïaroh ïa ka jingpyrshang jong ka CBSE ban kyntiew ïa ka jingshemphang ha ka liang ka saian hapdeng ki samla pule. “Kane ka prokram ym tang ba kan pynmih ïa ka jingkwah tip hynrei ka pynkhreh ruh ïa ki khynnah jong ngi ban pyrkhat kum ki nongthaw ïa ki jingmut thymmai,” u la ong.
Lyngba u kyrwoh u K.Dilip Kumar u la ong ruh ba khynnah skul ki la sngewtynnad bha ïa kane ka prokram da kaba pyni ïa ka jingsngewtynnad bad ka jingïatreilang ha baroh kawei ka jingtrei.
La pynkut ïa kane ka jingïalang da ki dur bad ki video kiba itynnad kiba pynpaw ïa ka mynsiem jong ka jingpynmih thymmai ban ïasam lang bad ka Atal Innovation Mission.
