Nongstoiñ, Rymphang 19: Ka Samla Barisuk Shyrkon kaba na Nongstoiñ, West Khasi Hills District ka la ïoh ban ïashim bynta ha ka prokram ai jinghikai ba la tip da ka Badminton Asia Education Program, BWF (Badminton World Federation) Level -1 Coaching Course.
ïa kane ka prokram la pynlong da ka Badminton Association of India [BAI] ha RG Baruah Sports Complex, Guwahati, Assam, kaba long 7 sngi lynter ha kaba la sdang ïa ka naduh ka 12 tarik Rymphang bad kut hynnin ka 18 tarik Rymphang, 2025.
Haba kren na ka liang jong ka Weat Khasi Hills District Badminton Association, u Bah Badon Marwein-General Secretary Jong ka WKHDBA, u la pynpaw ïa ka jingsngew kmen halor ka jingïashim bynta jong ka Samla Barisuk ha kane ka prokram ai jinghikai kaba heh jong ka Ri India.
“Nga sngewnguh ia ka Meghalaya State Badminton Association kaba la shimkhia ïa kane ka bynta bad kab la jied ïa i Samla Barisuk ban mihkhmat ym tang ïa ka District hynrei ïa ka jylla hi baroh kawei,” la pynpaw u Bah Badon.
U la bynrap ruh ba lehse kane kan long ka lad ka lynti na bynta ki khynnah samla kiba don ka jingthrang ban shimbynta ha ki kam sports bad ruh kan long kawei na ki jingpynkhreh ïa Ka National Games ka ban sa long ha u snem 2027.
