Shillong, Nohprah 15: Ka Dorbar Kur Warjri ba 27 la pynlong ha shnong Siejïong ha ka ba da ki hajar ngut ki paid ka kur Warjri ki la ïashim bynta ban ïa lum kur. Ha ka dorbar kur la don ki jingkren na ka bynta ban tei bad ïada ïa ka kur Warjri na kino kino ki jingkylla ki ba long pyrshah ïa ka riti dustur tynrai.
La pynkup burom ruh ïa ki parakur ki ba la tyngshaiñ ha la ki kam pule dangle ne kiwei kiwei ki jingtbit kyrpang. Ki ba la shah pynkup burom ki long ka samla Rifiness Warjri ka ba la jop pyrthei ban kiew sha kliar u Lum Everest ha syntai lum Makashang; Dr. Calvin Donkupar Warjri, ba la jop kyrdan PhD ha ka Zoology; Kynsailang Warjri, ba la jop kyrdan bahynriew na ki ba poi shakhmat eh ha ka BSc Microbiology; Rokesh Warjri, ba la ïohpdiang ïa ka takma na ka kam Fire Service; bad ka Rufina Warjri, ba la jop kyrdan baphra napdeng kiba wan shakhmat ha ka B.Com degree.
Nalor kata ka la don ruh ka jingïalehkai phutbol ha ka ba ka shnat Thynroit ka la jop shidor thong pyrshah ïa ka shnat Eastern West Khasi Hills bad la sam ïa ki khurinam bad ki takma ïa baroh arliang ki nongjop lahduh bad ka kynhun ba bud. Nalor kata la don ruh ki jingrwai bad jingshad tynrai ba la pynkhreh da ki khynnah samla bad rangbah na ka shnat Siejiong kynthup ruh ka jingrwai na shnat Mawkneng bad Nongspung ki ba la pynshongshit shikatdei ïa ka Dorbar Kur Warjri.
Ha kane ka kynti jong ka Dorbar Kur Warjri ha Siejiong, u Khlieh Rangbah, Bah Barkos Warjri u la iehnoh kam bad la thung bujli da u Bah Prosper Warjri u ba dei u symbud khlieh rangbah, kumta la jied thymmai da u Bah Rodson Warjri na Rangshken Urur ban shimti ïa ka kam Symbud Khlieh rangbah. Ha kaba kut artat ka dorbar la pynbna ba ka Dorbar Kur Warjri ha u snem ban wan 2026 la shimti da ka shnat Wahlang na West Khasi Hills.
