ïashim bynta 23 tylli ki shnong ha ka Convergence-cum-Enrolment Camp ka MSRLS

Mawkyrwat, ‘Nailar, 07: Ka ophis Block Mission Management Unit, Meghalaya State Rural Livelihood Mission (MSRLS), Ranikor Block ki la pynlong ïa ka Convergence-cum-Enrolment Camp ne ka jingïasynrop lang ryngkat ki tnad treikam jong ki ophis sorkar hapoh ka South West Khasi Hills District lem bad ki 23 tylli ki shnong ha shnong Lower Puksora, South West Khasi Hills District.
Ka jingpynlong ïa kane ka program ka dei da ka VC-VEC-VO kaba dei ka kam lyngba ka Block Mission Management Unit, Meghalaya State Rural Livelihood Mission (MSRLS), Ranikor Block (kaba hapoh ka ophis jong u Block Development Officer, Ranikor C&RD Block) bad kum shibynta ruh jong ka jingrakhe ïa ka Janjatiya Gaurav Varsh (JJGV) 2025 (Ka jingrakhe ïa ka snem ba kyrpang ki paid riewlum (ST), ka jingpynkupbor ïa ki paid riewlum ban kyntiew ïa ka ri India) hapoh ka Dharti Aaba Janjatiya Gram Utkarsh Abhiyan (DAJGUA).
Ka jingthmu ka long ban pynïasoh lang ïa ki tnad treikam jong ka sorkar lem bad ki paidbah jong ki shnong, ban ai jingtip shaphang ki katto katne ki skhim ba la kyrshan da ka sorkar India bad ka sorkar Meghalaya bad ban pynrung kyrteng ha ki jait skhim bapher bapher ba ki paidbah nongshong shnong ki dei hok ban ïoh.
Ha kane ka Convergence-cum-Enrollment Camp, na ka liang ki paidbah nongshong shnong ki la ïoh jingmyntoi ha kaba ki la ïoh ban pynrung kyrteng na ka bynta ki jingmyntoi halor ka jingai jingsumar ei ki don 81 ngut, ba pynthymmai ïa u Aadhar 53 ngut, kiba pynrung kyrteng thymmai ha u Aadhar 6 ngut, kiba leh ïa ka Aadhar link 12 ngut, kiba plie Bank Account thymmai 7 ngut, kiba leh ïa ka jingshimram ne SHG Bank Loan 5 ngut, ha ka PMSBY Enrollment 19 ngut, ha ka PMJJBY Enrollment 15 ngut, ha ka PM Kisan 34 ngut, ha ka jingsam ei ïa ki seed bad bio pesticide 24 ngut, ha ka Water Testing 4 tylli ki shnong, kiba aplai na ka bynta ka watershed project hapoh jong ka soil & water conservation 66 ngut, ka jinglum pisa na kaba die ha ki SHG stall ? 26,800 tyngka, kiba pynrung kyrteng ha ka E-shram 12 ngut, ha ka Smart Card/MHIS 41 ngut bad kiwei de kynthup ïa ki jingai jingpynshai paidbah na ki 16 tylli ki tnad treikam jong ki ophis sorkar kiba hapoh ka South West Khasi Hills District ha ryngkat ki 388 ngut ki nongïashimbynta.
Haba kren kum u kongsan, u Deputy Commissioner, South West Khasi Hills District Bah B. Mawlong, u la ai mynsiem na ka bynta ki paidbah ba ki dei ban shim kabu ïa kum kine ki jait program namar ki long kiba donkam haduh katta katta ha kaba na ka liang ka ophis MSRLS ryngkat ki tnad treikam jong ka sorkar ki wan lang shi jaka ban pynsngewthuh paidbah ïa ki lad pynroi jong ki paidbah kiba la pyntreikam da ka sorkar India bad kumjuh ruh na ka sorkar Meghalaya. “Ka jingwan jong ki kum ki ophisar sorkar ha kane ka jingïalang ka long ka jingmyntoi ïa ki paidbah nongshong shnong”, ong u bah Mawlong.
Kiwei de kiba la ïa donlang ki long u bah S. Marweiñ, MCS, Block Development Officer, Ranikor C&RD Block kum u symbud kongsan, u bah Eson Khongrymai, DMM, MSRLS, Mawkyrwat uba la ai ka jingkren khublei, u bah Klen Sangma, Mulor Shnong Lower Puksora lem bad ki paidbah ryngkat ki ophis sorkar.