Shillong, Jymmang 16: Ki saw tylli ki team ki la ïasam mar shi point ha ka lympung ïalehkai Women’s Football League 2021-22. Ka Lawei SC bad ka Nongkrem SC ki la ïakhaid da kaba thep mar shi kol ha ka jingïakhun na na ka Group B katba ka Rahjingshai bad ka Onside Sports ki thep mar ar kol na ka Group A ha ki jingïakhun ha ka sngi Nyngkong ha madan Third Ground, Polo, Shillong.
Haba phai sha ka jingïalehkai kaba nyngkong hapdeng ka Lawei SC pyrshah ïa ka Nongkrem SC, ka Nongkrem SC mar ba sdang ka jingïalehkai kala ïoh ban pynkhih jar lyngba ka Deiphibamon Warbah ha ka 1 minit bad ka la lah ban teh lakam bad bat bol bha ha ki minit ba dang sah.
Hynrei da ka jingïai ïakhun tyngeh bad khlem da ailad, ka Lawei SC ka la ïoh ban siew kylliang ïa ka shi kol shwa ban kut ka kylla step ba la thep da ka Sannity Jyndiang ha ka minit ba 44 bad haduh ba kut ka jingïalehkai ka ïakhaid da 1-1 kol.
Haba wanphai sha ka kylla miet, ka jingïalehkai ka la nang ïakhluid ha baroh arliang, hynrei baroh ar tylli ki team ki khlem lah ban pyndep ha ka liang ka thep kol bad hun ban ïasdam mar shi point.
Kane kadei ruh ka sien kaba nyngkong ba ka Lawei SC kan shah thep kol ha ki saw sien ki jingïalehkai bad ka lamkhmat nyngkong ha ka jingkhur point da 8 point bad bat kyrdan ba nyngkong ha ka miej kheiñ point na ka Group B, katba ka Nongkrem SC ka don ha ka kyrdan ba saw da san point.
Haba phai pat sha ka jingïalehkai kaba ar ha kajuh ka madan, ka Onside Sports ka la lamkhmat nyngkong lyngba ka shi kol ba la thep da ka Jerina Mawlong ha ka 9 minit hynrei ka Lili.L.Nongkynrih ka la thep ïa ka kol pynïakhaid na bynta ka Rahjingshai SC ha ka 20 minit. Tang hadien ar minit ba la sdang biang ka jingïalehkai ka Fragrancy Riwan ka la ïoh ban thep ïa ka shi kol kaba pynlong ïa ka Rahjingshai SC ban lamkhmat da 2-1 kol ha kaba kut jong ka kylla step.
Ha ka kylla miet ki thei ïalehkai ka Onside Sports ki la ïakhun tyngeh bad pashat bol bha da ka thong ban pynphai kol bad da kane ka rukom ïalehkai ka la wan urlong ha ka minit ba 46 ha kaba ka Makrisha Songthiang ka la thep ïa ka kol pynïakhaid.
Da kaba ïathep mar ar kol ka jingïakhun ka la nang ïathnem ha baroh arliang bad ki la ïakhun tyngeh ban pynphai kol, hynrei haduh kaba kut ka jingïalehkai ki khlem ïoh ban thep kol bad hun ban ïasam mar shi point.
Da kane ka jingïakhaid ka Onside Sports ka la ïoh ïa ka shi point bad kadei ruh ka sien kaba nyngkong na bynta kane ka team ban ïoh point ha kane ka samoi. Ka Rahjingshai SC ha ki saw sien ïakhun ka kamai hynñiew point bad sah sa shisien ïakhun pyrshah ïa ka Mawlai kaba kamai mar katjuh da hynñiew point ha ka Group A kaba don ha ka kyrdan ba ar.
Ka jingïalehkai mynta ka sngi Ba-ar ka Nongthymmai SC kan ïakhun pyrshah ïa ka Lumparing SC ha ka jingïalehkai kaba nyngkong ha ka por 1 baje nohphai sngi katba ka Mawlai SC pyrshah ïa ka PFR F.A ha ka jingïalehkai kaba ar ha ka por 3:30 baje janmiet.
