Ïasam jingtip markylliang ki riewlum ha Bangkok halor ka jingpynmih na ka bam bad rep tynrai

Shillong, Naiwieng, 03: Ka Indigenous Partnership for Agrobiodiversity and Food Sovereignty (TIP) lyngba ka jingkyrshan lang jong ka Pgakenyaw Association for Sustainable Development (PASD) bad ka Stockholm Environment Institute (SEI), Asia Office ka la pynlong ïa ka jingïalang ïamir jingmut ha ka 28th tarik u bnai baladep ha ka ophis treikam jong ka SEI , Asia ha Bangkok.
U Coordinator jong ka TIP Bah Phrang Roy haba kren ha ka kyntien lamphrang u la pynkynmaw ïa ki jingthmu jong ka UN Food System Summit 2021 kaba banjur ïa ka jingdonkam ba donkam ban peit ïa ka rukom pynmih bam kaba skhem kaba ka nongrim ka dei ha ka mariang bad ka bynta kaba kongsan jong ki riewlum ba ki dei ba leh, khnang ban jop ïa kane ka jingthmu.
“Ha ka jingïa phylliew jingmut ha ka jingïalang, kum ki riew lum, ngi la ai jingmut sha ka UN, ba lada ka UN ka kwah ban phaikhmat sha ka bam kaba bha bad kaba skhem, kan ym lah ban ïaid lait ne ban jngai na ki riewlum namar ka bam kaba ki pynmih ki long kiba la pynshong nongrim ha ka mariang,” la ong u Bah Phrang Roy bad pynpaw ruh ïa ka jingsngew sarong ba kumno ki riewlum ki wan shakhmat ban pynneh ïa ka spah mariang.
U Dr. Prasert Trakansuphakon, na ka PASD, Thailand, u la ïaroh ïa ka jingtrei jong ki riewkynthei kiba la ïalam ïa ka jingthmu ban ïada ïa ki rukom bam tynrai. U la kyntu jur ïa ka jingdonkam jong ki jaidbynriew trai ri ha kaba ïadei bad ban pyneh pynsah ïa ka mariang bad ban wanrah ruh ïa ki buit thymmai jong ka rukom rep tynrai kiba lah ban ïakhun pyrshah ïa ka jinglong ka suiñ bneng.
U Niall O’Conner na ka Stockholm Environment Institute (SEI) na dewbah Asia u la pynpaw ka jingïaroh ïa ka jingstad bad jinglong kyrpang ki riewlum. U pynpaw ruh ba u don jingkyrmen ba kane ka jingshemphang jong ki ka lah ban saphriang kylleng ka pyrthei khlem ka jingshah shim kabu ha kiwei.
Hadien ki kyntien lamphang la bud sa ka jing batai jong I Kong Gratia E. Dkhar, naka seng NESFAS I ba dei I nong khmih bad peit kumno ban pyntyllun ïa ka jingwad jingtip jong ka TAPE Study haki saw tylli ki ri kum ha Mexico, Kenya, Northern Thailand, and Northeast India.
Ka International TAPE Coordinator na NESFAS ka Kong Gratia Dkhar, ka la batai bniah bha ba kumno ka rep tynrai ka don ïa ka bor kaba khlaiñ ban ai ka jingshakri kaba ïaineh. Ka la ban jur ruh ba ngi donkam ban pynphriang ïa kane ka khubor sha ki nongshna aiñ ba ki dei ban ai ka jingkyrshan ban pynkhlaiñ ïa ka rep ka riang tynrai khlem da don kano kano ka jingniewbein ïa ka hok tynrai ïa ki jaka puta. Haba peit bniah bha ruh, ngi lap bad shem ba ki jingwadbniah haba ïadei bad ka rep tynrai ki dang duna bha.
“Namar kata ka daw, ka don ka jingdonkam kyrkieh ban kyntiew ïa ka jingïadei hapdeng ka jingtip tynrai bad ka jingtip saïan, bad ngi kyrmen bad khmih lynti ban tei ïa ki jingïatreilang ban buh ïa kine ha ki kam,” la kyrpad ka Kong Gratia ïa ki nongïashim bynta.
U Ecologist jong ka Indigenous Food Systems Expert bad Advisor jong ka TIP u Dr. Dhrupad Choudhury, u la batai bniah bha ïa ki sien jam ba kum ki riewlum ngi dei ban shim haba ïadei ban pynkhlaiñ ïa ka rep ka riang tynrai.
Ha kane ka jingïalang ruh lah pynsngew ïa ka jingmih na ka rynsan jingïalang kaba dang shu dep long shen ha UN-IFAD Rome ha u Bnai Risaw 11,2024.
Ka Nofri Yani, kaba wan na Indonesia bad u Daniel Hayward, FAO ki la ïasam jingmut lyngba ka jingshemphang jong ki halor ka jingkongsan jong ka Immersive Retreat (Ka jingleit jngoh sha ki shnong ki thaw) bad kumno kaba leit jngoh hi sha ki shnong ka pynsngewthuh shuh shuh ïa ka jingim bad jingtrei jingktah jong ki riewlum.
U Bah Richard Ranee, uwei na ki nongrep na ka shnong Nongtraw, East Khasi Hills u la pashat jingmut halor ka jingim jong ki nongshong shnong bad ka rukom rep rukom riang ha ka shnong kaba u wan kaba hap ban hiar kumba 4000 ki mawkyndon ban poi sha shnong.
U la kren shaphang ka jingkongsan jong ka rep shyrti ha ka shnong jong u bad u la ïathuh ruh shaphang ka jingriewspah jong ka thung ka tep bad ka bam ka dih kaba bsa bad kaba ai ïa ka jingkoit jingkhiah na ki jhur khlaw bad ki kynbat dawai bad u la ong ruh ba ka shnong ka ïatreilang bad ki longkmie ban wanrah ïa ka jingshong shngaiñ ha ka rep ka riang tynrai.
Ki don sa ar ngut ki riew shemphang jong ka jaitbynriew Karen, kata u Father Luang Chaiprasit Poka na ka shnong Hin Lad Nai bad u Siwakorn Odochow na ka shnong Nong Tao kaba don ha ri Thailand kiba la ïathuh, katkum ka jinglong jingim jong ki ka don ka jingïadei ba ïajan bha hapdeng ki briew bad ka mariang. Ki kdew ba kane ka jingïadei ba jan ka lah pynlong ïa ki ba kin ïakhun pyrshah ïa ka khlam Covid-19 khlem kano kano ka jinduna bam. Ki pynpaw ruh ïa ka jingsngewkmen ba kum ki longkmie ki don ruh ïa ka iktiar ban leh kham bha shuh shuh ban kyntiew ïa kane ka kam. Ka don ruh ka jingïakren halor ka jingkongsan jong ki bynta bapher bapher kiba ïarap ban pynphriang ïa ki symbai kiba dei ki thymmei ban pynriewspah ïa ka mei mariang khamtam kum ki ngap kiba ngi ju ïohi bha ha ki shnong ka thaw.
U Boonsong Thansrithong, ECHO Asia u la ai jingmut ïa ka rukom pynlang symbai jong ki nongrep na ka ri Asia baroh kawei bad ki symbai kiba biang tam ki lah ruh ban ïasam bad ki para riewlum. Katba u Aditya Gangadaran jong ka “The Nature Conservancy” u lah ai jingmut ban kyrshan ba dei ban pynkhlaiñ ïa ka ïoh ka kot kaba ban wan na ka spah mariang. Ka Tara Shyam, Director REGEN10 ka la ïaiban ba ki rukom pynmih bam ba ai jingim ki dei ban wanrah ïa ka jingbha ïa ka mei mariang, ka ïoh ka kot kaba neh bad khamtam kiba ïadei dur bad ka kolshor bad riti dustur. Ka pynpaw ruh ïa ka jingkloi ban ïa treilang bad ka TIP ban ïoh ïa kane ka thong.
La pynbud da ki jingai jingmut na ki ki riewlum kiba ïadon ryngkat ha ka jingïalang ha kaba ki lah ïa mynjur lang ban pynkhlaiñ shuh shuh bad bat skhem ïa ki jaka ki pud ki sam da ki jaitbynriew riewlum na ka bynta ban ïada ïa ki spah mariang. Ka la mih ruh ka sur ba ngi donkam ban pynkhlaiñ ïa ka jingïadei bad ki khun samla ba kin ieid bad burom ïa ka rep tynrai.
Kaba sngewtynnat shuh shuh ka long ba u Director jong ka SEI Asia u Niall O Conner, u la ïawer ban ïa treilang nangne sha khmat ban jop ïa kane ka thong.