ïaroh u samla thut dkhot met ïa ka tnad Pulit Ri Bhoi ba khanglang ïa ki kali ba ñiah khlemakor

Nongpoh, Naitung 16: Kum uwei u samla uba don hapeng ka jingthut ka dkhot met bad uba don pat kata ka jingïakitkhlieh lang na ka bynta ka imlang ka sahlang, u Samla Paring Pale u la mih shakhmat ban ai khublei kyrpang ïa ka tnad Pulit Ri Bhoi bad ïa ki Ophisar kiba la shim khia na ka por sha ka por ban tehlakam ïa ki Kali saw shaka bad ki Kali ar shaka kiba niah khlemakor ha ka surokabah Natioinal Highway-6 ha Ri Bhoi District.
U Samla Paring Pale, u dei u samla na don ka jingthut dkhot met bad uba shong basah ha ka shnong Umpowin ha Ri Bhoi District bad u la mih shakhmat ban ai jingïaroh ïa ka tnad Pulit na Ri Bhoi, ka dei halor ka nongrim ba bunsien tang na ka daw ka jingñiah khlem akor bad ka jingbuaid ki mih ki jingjia ba sngewsih kiba ktah ïa ka jingshngaiñ ki paidbah ha ka leit ka wan lyngba kane ka surokbah.
Haba ïa kren sha ki lad pathai khubor, u Samla Paring Pale, u la ong ba um lah ban shu sngap khlem da ai khublei ïa ki pulit ophisar kiba trei shitom na ka bynta ka jingsngaiñ ki paidbah ha ka leit ka wan bad kawei na ka nuksa kaba u la ai jingïaroh ka dei ka jingkyrpad jur u pulit ophisar ïa ki kmie ki kmpa ba kim dei ban ai shabi bike ne Scooty ha ka sngi u Blei ïa ki khun ha kaba ha ka jaka ba kin leit jingïaseng bad ki pynlut por pynban ban pynlong ïa ka surokbah National Highway-6 ha Ri Bhoi kum ka jaka ïalehkai sport kali.
U la ong ruh bunsien ki ju mih ki jingjia ba mynsaw bad ba duh noh ïa kiba bun ki mynsiem ba kordor ka dei na ka jingñiah khlemakor bad ka jingbuaid haba ñiah kali bad dei pat tang kito ki longïing kiba mad ïa ki jingjia ba sngewsih ki sngewthuh ïa kata ka jingshah ktah lada ai mon ïa ki khun ban ñiah ïa ki Kali ar shaka bad ki kali saw shaka ba ka dei hok ba ki Pulit ki hap ban tehpyrkhing.
Shuh shuh, u la bynrap ruh da kaba ong ba u ai khulei kyrpang ïa ka tnad Pulit Ri Bhoi ha ka jingïalam u V.S Rathore kum u SP ka Ri Bhoi ba kin dang bteng ka jingtehpyrkhing ïa ki Kali ba ñiah khlemakor bad ki dei ruh ban leh katkum ki kyndon ka aiñ khnang ban lah ban ïada na kino kino ki jingjia ba mynsaw ne ki jingjia ba sngewsih kiba ktah ïa ka imlang ka sahlang, u la bynrap.