Shillong, Naitung 31 :Kum shi bynta ka jingrakhe ïa ka Azadi Ka Amrit Mahotsav – ban rakhe ïa ka jingdap 75 snem ka jinglaitluid jong ka Ri India, ka ophis jong ka Deputy Commissioner East Khasi Hills ha ka sngi Saitjain ka lapynlong ïa ka Grand Finale jong ka Ujjwal Bharat Ujjwal Bhavishya, Power@2047 ha Soso Tham Auditorium ha kaba u Myntri PHE Bah Renikton Lyngdoh Tongkhar u la donlang kum u Kongsan, katba u Bah D. P. Wahlang, IAS, Additional Chief Secretary ba dei ruh u CMD ka MeECL kum u Symbud Kongsan.
Haba kren kum u Kongsan ha katei ka sngi, u Bah Renikton u la ïaroh ïa ki skim bapher bapher ba ïoh da ka tnad bording jong ka sorkar pdeng kumjuh jong ka sorkar Meghalaya ban pyntikna ba man la ki thliew iing kiba don ha baroh kawei ka jylla bad ha ka ri kin ïoh bording. U la ong ruh ba ka sorkar ka dang ïaid mynta ban ïakhun ban weng ïa ki jingeh kiba ka tnad Bording ka ïakynduh bad pyntip ruh ba ka sorkar lyngba ka Power Department ka la mang pisa na ka bynta palat 300 tylli ki transformer ba thymmai khnang ba kin ïoh ban pyndait noh ha kito ki jaka ba la duh kiba don ha ki shnong ki thaw.
Ha katei ka jingïalang lyngba ka jingïasyllok online la pynsngew ruh ïa ka jingïakren hapdeng u Myntri Rangbahduh ka Ri u Narendra Modi bad ki nongïoh jingmyntoi ïa ki skim bording ha baroh kawei ka ri.
Kiba donlang ha kane ka jingïalang ki kynthup ïa u Dr Shakeel P Ahammed, IAS, Principal Secretary, Power ka sorkar Meghalaya, Kong Isawanda Laloo, IAS, Deputy Commissioner East Khasi Hills District, u V. F Desouza, CPSE State Nodal Officer nalor kiwei kiwei.
