Ïaroh u Myntri ka Sorkar Pdeng ba trei borbah ka ICAR ban ïarap ïa ki nongrep ha Meghalaya

Nongstoiñ, Naitung, 17: Ka Krishi Vigyan Kendra (KVK) West Khasi Hills ka la ïashim bynta ha ka virtual prokram (online) kaba dei ka “94th ICAR Foundation Day and Award Ceremony” ba la pynlong da ka ICAR ha A P Shinde Symposium Hall, NASC,PUSA, New Delhi ha ka 16th July 2022. Ïa kane ka prokram la wan plie da u Union Agriculture Minister & Farmers Welfare, Shri Narendra Singh Tomar ryngkat ka jingïadonlang lang u Union Minister of Fisheries, Animal Husbandry & Dairying Shri Kailash Chaudhury bad u Director General, ICAR Dr. Trilochan Mohapatra.
Ha ka jingkren jong U Union Agriculture Minister, u la ïaroh ïa ka jinglah jong ka ICAR ban lum ki khana jingjop (success stories) haduh 75000 ngut ki nongrep kylleng ka ri. U Kongsan u lah ïakren ruh bad ki katto katne ki ongrep na ki jylla ka ri halor ka jingiohnong ka jingioh kamai lyngba ki buit jingstad ha ka rep ka riang bad ka ri jingri.
Ha kane ka prokram, ka KVK West Khasi Hills ka la khot ïa U Syiem Hima Mawiang, Bah N Syiem kum u Kong-san ha kane ka sngi ryngkat ka jingïadonlang kumba 90 ngut kynthup ki nongrep bad ki nongtrei jong ka ophis KVK. Ha ka jingkren jong U Syiem, u la ïaroh ïa ka ophis KVK kaba la hikai ïa ki nongrep ban rep organic lyngba ki jinghikai rep thymmai bapher bapher. U la pynshlur bad ai mynsiem shibun ïa ki nongrep ban ym don ka jingsngew-lehrain ïa ka kam rep bad ban shim ïa ka kam rep kum kawei na ki lad iohkam iohjam khamtam eh na ka bynta ki khun samla.