ïaroh u MP Shillong ïa ki jingtrei shitom ki Ophisar SWKH wat hapdeng ki jingeh kiba bun

Mawkyrwat, ‘Naitung 10: U MP ka Lok Sabha na Shillong Constituency, u Dr. Ricky A.J. Syngkon ha ka sngi Thohdieng u la hiar sha South West Khasi Hills ban bishar bniah ïa ka jingpyntreikam ïa ki skhim bad ban sngewthuh ïa ki jingeh ba ki tnad treikam ka Sorkar kiba hap hapoh ka South West Khasi Hills District.

Ha ka jingïalang ba la pynlong da ka District Development Coordination & Monitoring Committee (DISHA)  ha  Laitlawsang, South West Khasi Hills, District la ïadonlang u Deputy Commissioner Bah B. Mawlong, Addl. DC Bah L.T. Tariang, u MLA ka Mawkyrwat Constituency Bah Renikton L. Tongkhar, u MLA ka Ranikor Constituency Bah Pius Marweiñ, u MDC ka Mawkyrwat Constituency Bah Pynkhraw Kharjahrin, ki ophisar sorkar na ki tnad treikam bapher bapher.

Ki ophisar jong ki 22 tylli ki tnad treikam ka sorkar ki la ai ïa ki kaiphod halor ki jingpyntreikam ïa ki project na ki tnad bapher bapher da kaba pynpaw ïa ki jingjop jong ki, ki jingeh, bad kumjuh ruh ïa ki jingthmu na ka bynta ki sngi ban dang wan.

Ki 22 tylli ki tnad treikam kiba la ai ki kaiphod ki long ka Rural Development jong ka DRDA lyngba u Project Director jong ka DRDA, ka Rural Development (PWD) lyngba u Executive Engineer PWD (Rds.) Mawkyrwat/Ranikor, ka Agriculture & Farmers Welfare ba kynthup na ka DAO, DHO & DPD, ka Water Resources, River Rejuvenation na u Executive Engineer jong ka Water Resources, ka Animal Husbandry & Dairying ba la ai na u District Animal Husbandry & Veterinary Officer.

Nangta, ka Women & Child Development bad, Empowerment of Persons with Disabilities na u District Social Welfare Officer & District Programme Officer, ka Health & Family Welfare bad Pharmaceuticals na u District Medical & Health Officer, ïa ka Drinking Water & Sanitation na u Executive Engineer, PHE Mawkyrwat Division, ka Land & Resources na u Divisional Soil & Water Conservation Officer, ka Education lyngba u District School Education Officer, DMC & Sub-Divisional School Education Officer, ka Petroleum & Natural Gases, Food & Public Distribution bad Consumer Affairs lyngba ka Inspector of Supply.

Shuh shuh ïa ka Road Transport & Highways lyngba u District Transport Officer (DTO), ka Ministry of Mines lyngba u Assistant Commissioner ba dei peit DMF, ka Basin Development Unit lyngba u District Project Manager, BDU-MBDA, ka Small & Medium Enterprise lyngba u General Manager jong ka DCIC, ka Fisheries lyngba u Superintendent of Fisheries, ka Labour & Employment lyngba u Assistant Labour Commissioner, bad ka Finance lyngba u Chief Manager, Lead Bank.

Na ka liang ki ophisar ki la pyni bad pynpaw ïa ki jingtreikam jong ki hapoh ka District lyngba ki PowerPoint Presentation, ha kajuh ka por ki la ïohlad ban pynpaw ruh ïa ki jingeh ba ki ki ïa kynduh ha ki jingtreikam ba kin pyntyllun ïa ki kam pynroi.

U MP u la ai mynsiem ba kim dei ban kynran dien hynrei ki dei ban ïaid shakhmat da kaba thom ïa ki jingeh khnang ba ka jingthmu ban pynpoi ïa ki kam ba bha jong u paidbah kin urlong.