Ïaroh u Lat ka jylla ïaka jingkiew ka skulbah USTM, yn leit shim bynta haka Convocation ba 11

Nongpoh, Nailur 08: Ka kynhun ba ha khlieh duh jong ka University of Science and Technology Meghalaya (USTM) ka la ïakynduh ïa u Lat ka Jylla, u C.H. Vijayashankar bad ïa kane ka kynhun la ïalam da u Mahbubul Hoque, Chancellor ha kaba la synran lang da u Vice Chancellor Prof. G.D. Sharma, Pro Vice Chancellor Padma Shri Dr. Sharma, Principal ka IAMC, ha ryngkat ki heh ophisar jong ka USTM shuwa ka jingpynlong ïaka jingpynkup burom ïaki samla pule haka convocation ba 11 ka ban sa long shen.
Ha katei ka jingïakynduh bad u Lat ka jylla naka liang ki heh ka USTM kila ioh ruh ka lad ban pyni ïaka jingjop ba dang shen jong ka skulbah ha kaba ïadei bad ka pule ka puthi bad kum ka kynhun jong ka USTM ka la ai ïa ki kaiphod treikam ba bñiah kiba pyni ïa ka jingkiew sted bad shaphrang jong ka skulbah.
Naka liang u Lat ka jylla u C. H. Vijayashankar u la pynpaw ïa ka jingsngewkmen kaba khraw ïa ki jingjop jong ka USTM ha kaba ïadei bad ka pule ka puthi bad ai khublei kyrpang ïa ka skulbah namar ba ka la ïoh ban rung haka thup ki 200 tylli ki skulbah ba paw haka ri India kaba dei ruh ka snem ba 4 sien kynthih ba katei ka skulbah ka rung hapoh katei ka thup bad kane ka pyni ïaka jingtrei shitom ka jinglen lade naduh ki bor pynïaid haduh ki nonghikai ryngkat ki samla pule ban rah ïaka burom ba shalor jong katei ka skulbah.
Ka kynhun ka la ïakren ruh ïa ki jingpynkhreh na ka bynta ka jingïalang pynkup burom ha ka Convocation kaba 11 kaban sa wan, ha kaba u lat ka jylla u la kular ban shim bynta lang bad ban ai mynsiem ïaki samla pule.