Shillong, Naitung 31 : U Lat ka Jylla, u CH Vijayashankar ha ka sngi Palei u la ai ka jingïaroh ïa ka Ri Bhoi District namar ka jinglah jong ka ban kot sha ka thong ha ki lai tylli ki bynta ba kongsan bha kata, ha ka jingsam ïa ki jingbam ba tei sha ki longkmie armet, nangta ka jingsam ïa ki soil health card bad ruh ka jingsam biang por ïa ki kot pule sha ki khynnah skul.
Ha kajuh ka por u la ai ruh ka jingïaroh ïa ka Amlarem, Resubelpara bad ka Umling Block kiba la pyndonkam hok ïa ka soil health card kaba plie lad ïa ki ban kiew stet ha ka rep ka riang bad ruh kyntiew ïa ka kamai kajih jong ki nongrep.
Ïa kane, u Lat ka Jylla u la pynpaw ha ka jingrakhe ïa ka Sampoornata Abhiyaan Samman, kaba la long ha Raj Bhavan Shillong ha kaba u Chief Secretary ka Jylla, Bah DP Wahlang u la donlang nalor kiwei kiwei ki heh sorkar nalor ki tnad treikam bapher bapher.
Kane ka jingïalang ka rakhe ruh ïa ka jingle bha jong ka Meghalaya ha ka Sampoornata Abhiyaan, ka prokram kyrpang ba la pyntreikam da ka NITI Aayog naduh u Naitung 2024 haduh u Nailur 2024. Kane ka jingïalap ka dei beit haka jinglah pyntreikam ha ki hynriew tylli ki mat (Key Performance Index) ha ki Aspirational District bad ruh ha ki Aspirational Blocks Programme kaba buh thong eh ïa ki thain ba dang donkam bun ki kam pynroi ha kylleng ki bynta jong ka Ri.
Ha kane ka prokram la ïoh ruh ïa ka jingkren na u Dr. Joram Beda, IAS, Commissioner and Secretary, Planning, Investment Promotion and Sustainable Development Department bad ruh na u Bah D.P.Wahlang, IAS, Chief Secretary ka sorkar Jylla ba la batai bniah bha halor kane ka mat.
U Lat ha ka jingkren u la ai ka jingïaroh ruh ïa ka jingtrei borbah jong ki Deputy Commissioner, Block Development Officer, ki nongtrei ba hakhmat eh bad ruh ki nongtrei ha ki shnong ki thaw kiba la don bynta lang ha katei ka jingjop. U ong ruh ba ka jingjop jong ka Sampoornata Abhiyan ka dei ka sakhi ïa ka bor jong ka jingtreilang khamtam eh naduh ki shnong ki thaw.
