Shillong, Ïaïong 24: U Sharath Kamal u nongïalehkai table tennis pawnam ka ri India uba khur takma Ksiar saw sien ha ka Commonwealth Games u la pynpaw ka jingbynñiaw bad sngewthuh khambha ïa ka jingeh ba ki nongïalehkai table tennis ka jylla Meghalaya ki ïakynduh ha ki tournament kiba heh kum ka 83rd Senior National Table Tennis Championship kaba dang ïaid shaphrang mynta ha nongbah Shillong.
Watla ki nongïalehkai ka jylla Meghalaya kila trei shitom ha kane ka jingïalehkai, hynrei ki khlem poi sha ka thong haduh kaba kut, hynrei na ka liang u Sharath Kamal u la ong ba ki nongïalehkai kila lah ban ïalehkai bha.
“Phim lah ban ong ba ki khlem ïalehkai bha. Phi hap ban peit ïa ka jingkiew ka jong ki ha ka jingïalehkai kumba ka long mynta bad phi donkam ban ai ka por kaba biang na bynta jong ki. Tang da kaba khmih lynti ba kin ïalehkai bha kata ka bym lah ban long ba phin shu ong ba ki khlem ïalehka bha,” ong u Kamal, uba ïalehkai khadduh ha nongbah Shillong ha u snem 2007.
“Nga sngewthuh ba hangne kadei ka jaka kaba eh bha na bynta ki nongïalehkai na ka daw ka jinglong jingman jong ka jaka.”
U Sharath Kamal ba la 39 snem ka rta u la pynpaw ruh ka jingsngewkmen ban wanphai biang sha nongbah Shillong. Kane ka wat ïalehkai kadei kaba heh tam ha ka history jong ka National TT championship, ha kaba ki don haduh 38 tylli ki kynhun ïalehkai jong ki shynrang bad 35 tylli jong ki kynthei bad 500 ngut baroh ki nongïalehkai table tennis.
“Nga sngewtynnad palat ban wan hangne namar nga tip ba ki player bad ki official bad ki nongpynïaid (Meghalaya Table Tennis Association) kila trei shitom borbah ban pynlong ïa kane ka lympung kaba ïaid beit ïaid ryntih bad nga dap da ka jingsngewkmen kaba khraw ban don bynta lang ha kane ka tournament. Ka Meghalaya kala leh ïa kaba bha tam la ka long ha kaban pynlong ïa kane ka jingïalehkai bad ki jingdonkam ha ka liang ka thiah ka dem, ka bam ka dih bad kiwei kiwei,” ong u Kamal, uban sa ïakhun quarterfinal ha ka ïalehkai ba para marwei ha kane hi kajuh ka sngi.
Kumba ka India ka dang ïai pynjanai na uwei u mawjam sha u wei pat ha ka table tennis, u Kamal u la ong ban nang kham pynjanai shuh shuh ka donkam ïa ki jaka ïalehkai bad ki tiar ki tar kiba biang.
“Ka India kala leh ïa kaba kongsan tam ha kine ki saw bad san snem ba lah leit noh hynrei ban nang kham pynjanai shuh shuh ngi donkam ban don ki tiar ki tar ïalehkai bad khamtam ha ka liang ki jaka ïalehkai. Ka jingïalehkai hapoh ka ri India kala ïaid shakhmat ha kine ki 10 snem bala leit noh hynrei ngi donkam ban dang pynlut shuh shuh. Ha kine ki snem ngi la ïoh ka jingkyrshan kaba biang bha na ka sorkar, na ki synjuk bad ki kiwei kiwei,” la ong u Kamal, uba khur takma ruh ha ka Asian Games bad Asian Championships.
Na bynta ki nongïalehkai dang khie kiba la wan shakhmat ban shim bynta ha kane ka lympung, u Kamal u la ong ba ka bynta kaba kongsan tam na bynta jong ki ha kane ka jingïaid lynti ka donkam ba kin kilan met bha.
“Aiti lut ïa ka mynsiem jong phi bad phin ïoh kheit ïa u soh ba thiang. Na kane ka daw ba nga la long uba tbit hapoh ka ri. Ban nang roi shuh shuh nga la hap ban mih na la ka jong ka ri ruh kumjuh. Na bynta ki nongïalehkai ka jyla Meghalaya bad kiwei pat kiba kwah ban kiew shaphrang, donkam ba phin wad ka jaka kaba lah ban ai jingshakri kaba biang tam ha ka liang ki jaka ïalehkai. Phi donkam ruh ban mih nala ka jong ka jaka ha kajuh ka por ruh donkam ka jingkyrshan na kiba haïing hasem.”
