Ïaroh u DyCM ïa ki nongïakhih pyrshah NHIDCL, palat 100 sien ngi la shong jingïalang

Shillong, K’Lyngkot 17 : Ka dei ha ka sien kaba nyngkong ba u Symbud Myntri Rangbah ka Jylla ba bat ruh ïa ka tnad Kam-pohiing ka Jylla Bah Prestone Tynsong un ai ka jingïaroh ïa ka kynhun ba pynlong ïa ka jingïakhih ha ka nongbah.
Kane ka jingïaroh jong u Symbud Myntri Rangbah kadei ïa ka jingmih jong ka Federation of Riwar Mihngi Local Durbar ryngkat ki seng bapher bapher ban rah placard hakhmat ka ophis treikam jong ka NHIDCL kaba don ha Barik ban pyrshah halor ka rukom pyntrei ïa ka surok na Shillong – Pynursla sha Dawki.
Na ka liang u Bah Prestone haba kren bad ki lad pathai khubor u la ong, “Na ka liang ka sorkar ngi la khot ïa ka jingïalang ym duna shuh ïa ka 100 sien bad ka NHIDCL. Wat na ka liang ka sorkar ruh ngim sngewtynnad shuh ïa ka rukom treikam jong ki bad shen ngin sa khot biang ïa ki.”
Ha kajuh ka por u la ong ba u kmen ban ïohi ba ki nongïalam shnong ryngkat ki kynhun seng kiba la mih paidbah ban leit ïakhih hakhmat katei ka ophis treikam.
“Wat nga ruh nga kyrshan ïa kane namar ngi la ïohi ïa ka rukom treikam jong ki la bym ihun satia. Peit wat ha Assam ruh ka la mih ka jingujor kaba jur na ki paidbah halor ka rukom treikam jong ki,” la bynrap biang u Bah Prestone.
Haba kylli kaei ka rai ba ka sorkar kan shim haba ïadei bad kane, na ka liang u Bah Prestone u la pyntip ba da shisien un lum biang ïa ka jingïalang ba khatduh bad kin sa shim artad ïa ka rai.