Shillong, Nailur, 12: U Myntri Rangbah ka Jylla Conrad K Sangma ha ka sngi Thohdieng u la ïaroh ïa ka rai jong ka Sorkar Pdeng ban pynbeit ïa ka dor jong ka GST da kaba pynpaw ïa kane kum ka jingpynkylla kaba kongsan ka ban pynmyntoi ïa ka jingim jong ki nongshong shnong ka Meghalaya.
U Sangma u la ong, “nga ai khublei ïa u Myntri Rangbahduh ka ri u Narendra Modi, ïa ka Myntri kaba khmih ïa ka tnat Pla Tyngka jong ka Sorkar Pdeng ka Nirmala Sitaraman bad ïa baroh ki dkhot jong ka GST Council na ka bynta kane ka rai kaba kongsan.”
“Kane ka rukom pynsuk kaba ar kyrdan kan pynkiew ïa ka jingkynshew pisa jong ki longïing longsem bad ka jingïohnong kaba lah ban pyndonkam namarba bun na ki mar kynthup ïa ki tiar ba donkam manla ka sngi kin kham rem dor. Kane ka rukom siew khajna kaba thymmai kaba ar kyrdan la khmih lynti ruh ba kan kyntiew ïa ki kam khaii namar kan pynsuk ïa ka jingbud ryntih bad kan kyntiew ïa ka jinglah ban ïakhun ha ka pyrthei jong ka karkhana India,” u la ong haba bynrap, “ngi pdiang sngewbha ïa kine ki jingpynbha bad sa shisien ngi pynpaw ka jingai khublei ïa u Myntri Rangbaduh ka bynta kine ki jingpynkylla kiba kongsan bha ki ban kyntiew ruh ïa ka jingim jong baroh ki nongshong shnong jong ka Jylla Meghalaya.”
Ïa ka jingpynbeit ryntih ïa ka dor jong ka GST la mynjur ha ka jingïalang jong ka GST Council kaba 56 kaba la pynïaid da ka Myntri ka tnat Pla Tyngka jong ka Sorkar Pdeng. Kine ki jingpynkylla ki long ban pynbha ïa ka jingim jong ki riewpaidbah bad ban pynthikna ïa ka jingsuk ban leh ïa ki kam khaii na ka bynta baroh, kynthup ïa ki nongkhaii barit bad ki nongtreikam lajong.
Kane ka jingpynbeit ryntih ka la pynduh noh ïa ka khajna kaba 12 percent bad 28 percent bad ka la wanrah ïa ka rukom siew khajna kaba ar kyrdan ryngkat bad ka dor kaba 5 percent bad 18 percent, ryngkat bad ka jingsiew khajna kaba thymmai kaba 40 percent na ka bynta ki mar rem dor.
Kane ka jingsiew khajna ba thymmai kan treikam nh naduh ka 22 tarik, Nailur, 2025.
