Ïaroh u Asst Coach ka India ïa ka JN Stadium kum ‘kawei na ki madan phutbol ba paka tam ha ka Ri’

Shillong, Rymphang 18 : Watla ka jingpynkhreh na ka liang ka sorkar Meghalaya kumjuh na ka Meghalaya Football Association ka dang ïaid shakhmat na ka bynta ban pynlong ïa ki ar tylli ki lympung ïalehkai barri kiba heh ha madan JN Stadium Polo, Shillong, ka la mih sa kawei pat ka khubor kaba sngewtynnad kaba na ka liang u Assistant Coach jong ka kynhun ïalehkai ka Ri u Mahesh Gawali u la pynpaw ba ka madan ïalehkai ha Shillong ka paw kum kawei na ki madan ïalehkai kiba paka tam ha ka Ri.
Ïa kane u Assistant Coach u la pynpaw hadien ba u la wan ban jurip ïa ka madan JN Stadium bad kumjuh ïa ka jaka kila met ha madan jong ka North-Eastern Hill University. Ka All India Football Federation dang shen mynta u bnai ka la pyntikna ba ka madan JN Stadium kan ïoh ban pynlong ïa ki ar tylli ki jingïalehkai barri kiba ka kynhun ialehkai phutbol ka Ri kiban long ha u Lber mynta u snem.
Katkum ka prokram, ka kynhun ïalehkai ka India kan ïakhun paralok (FIFA Friendly) pyrshah ïa ka Maldives ha ka 19tarik u Lber katba ka jingïakhun knieh rung sha ka AFC Asian Cup 2027 pyrshah ïa ka Bangladesh kan long ha ka 25tarik Lber.
Ha kane ka jingjurip u Gawali u la ai jingïaroh ïa ka madan JN Stadium ba la pynthymmai, da kaba khot ïa ka kum “kawei na ki madan phutbol ba paka tam” ha ka ri baroh kawei. Une u assistant coach u la bishar bniah ruh ïa ka madan kaba jyrngam, ki jaka ieng bad ki kamra kylliang jain. Ka jingtrei ka dang ïaid shakhmat ban pynbha ïa ka madan ïalehkai bad kumta na ka liang u Gawali bad ka MFA, ba la mihkhmat da u Vice-President jong ka, u Cliff Nongrum, ki la ïakren ban buh ruh ïa ki kamra kylliang jaiñ kiba lah ban rah, bad kiwei kiwei.
U Gawali u la ai jingmut ba ka madan ïalehkai kaba don ïa ki jaka ïalehkai ba don ïa ki jingtei kiba neh kan pynlong shisha ïa ka Shillong kum ka jaka ba paka tam na ka bynta ka phutbol kaban ïa ryngkat kyrdan bad ki ri ka pyrthei.
Ka India ka la shah kynthup lang ha ka Group C jong ka AFC Asian Cup 2027 qualifiers final round, ryngkat bad ka Hong Kong, Singapore bad ka Bangladesh. Ki kynhun kin ïakhun arsien ha ka rukom ïalehkai kaba ïalehkai ha ïing bad shabar haduh u bnai Lber 2026. Ki kynhun kiba jop ha ka Group kin ïoh rung sha ka lympung ïalehkai Asian Cup.