Shillong, Rymphang 1 : Ki Nongshong die madan bala pynkynriah na lynti ïaid kjat ka Civil Hospital sha sha phyllaw PWD, Barik, kila pynpaw ka jingsngewnguh bad ai ka jingïaroh ïa ka Sorkar Jylla bad ka Shillong Municipal Board (SMB) halor ka jaka shong dukan madan ba thymmai.
“Ka jaka ka kylluid bha bad kan ai jaka rieh ïa ngi na u slap bad ka sngi ha kine ki bnai ban wan” ong iwei I nongshong die madan iba la ïaroh ïa kane ka sienjam ba shim da ki bor Sorkar.
Iwei pat ila pynsngew “Kane kan nang pynkhlaiñ ïa ka kam jong ngi ïa ka hok ban kamai jakpoh hangne ha Sor”.
Kumba 30 ngut ki nongshong die madan kila die ïa ki mar bapher bapher ha kane ka jaka shong dukan ba thymmai.
“Ka kamai jong ngi ka shu ïabiang hi, hynrei ngi kyrmen ba ki briew kin kyrshan ïa ngi hangne kumba ki ju leh ha Civil Hospital” kila ong.
Kane ka jingpynkynriah kala pynkylluid ïa ka surok bad ailad ïa ka ïaid ka ïeng ba kylluid jong ki kali bad ki briew najan ka Civil Hospital.
