Khliehriat Nohprah 07 : U Manager jong ka tnat CSR jong ka company Star Cement Lumshnong, u kingshok.K.Borah lem bad ka kynhundang shen u la leit jurip ïa ka shnong Tuber Kmaishnong East Jaiñtia Hills District kaba dei kawei ba ki shnong kaba shim khia bha ha kaba pynneh ïa ka khuid ka suba hapoh shnong bad u la ai ka jingiaroh ïa ka jinglah ka Dorbar Shnong ha kaba pynneh pynsah ïa ka khuid ka suba ha shnong ha thaw.
Katei ka jingleit jngoh ka tnat CSR ka dei halor ka jingialap ne ka campaign kaba don ki kyntien phira kaba ong ‘ To ngin rat dyngkhong ïa ki plastik bad wanrah ïa ka mariang kaba lait na ki jakhlia plastik bad ban rat dyngkhong ïa ki jakhlia plastik’ bad ruh halor kane ka Star Cement ka pynpaw ba ka long la kloi ban shimti ïa ki jakhlia platik na ki shnong ki thaw ban thang ingkhong ïa ki haki pajwa ne ki clink hapoh kane ka karkhana saiñ dewbilat kaba don ha Lumshnong, halor kane ka CSR ka kwah ruh ba ki nongshnong shnong ki dei ruh ban shim khia lem ha kaba kin sngewbha ban pyniakhlad lypa ïa ki ñiut kiba pyut bad ki ñiut ki bym pyut kum ki plastik namar ka company kan shim tang ïa ki ñiut kiba dei ki plastik bad kit sha company ban thang.
Ha ka jingjurip ka kynhun kaba na ka tnat CSR Star Cement Lumshnong ka la leit jngoh ruh ïa ka jaka bret ñiit ha shnong Tuber Kmaishnong lem bad ka kali kit ñiut ban kit ïa ki byrni kiba la dep thep ïa ki plastik jot kiba jakhlia.
Ka kynhun ka la lap ruh ba katei ka jaka bret ñiut ha shnong Tuber Kmaishnong wat la ka dei ka jaka ba bret bad pynlang ïa ki ñiut ki jaboh hynrei kam shym la don satia kano kano ka jingsma iw tung kaba mih na ki ñiut bad kane baroh ka dei namar ka jingshim khia ka shnong ha kaba ki bor pyniaid shnong naduh ki snem kiba la leit ka la lah ban buh da ki nongtrei ha katei ka jaka ba theh ñuit bad ki nongtrei ki la trei ïa ka kam ha kaba ki ju pyniakhlad ïa ki ñiut kiba pyut bad ki ñiut ki bym pyut bad buh ïa ki la ka jong ha kajuh ka por ki nongtrei ki ju shim khia ruh ha kaba pynkhuid ïa ka sawdong sawkun ha katei ka jaka bret ñiut.
Haba jurip ïa ka shnong ka thaw, la lap ruh ba ka shnong Tuber Kmaishnong ka phuh ka phieng da ka khuid ka suba ha baroh kawei ka shnong.
Haba kren sha ki pathai khubor, u Kingshok.K.Borah u la ai ka jingiaroh ïa ka jinglah ka shnong Tuber Kmaishnong ban pynneh pynsah ïa ka khuid ka suba hapoh shnong bad ong ba ka don shisha kata ka jinglong kaba ryntih bha ha kaba iadei bad ka jinglah ban pynkhuid ïa ki jakhlia khamtam ki platik jot bad ong ba kane ka dei ka nuksa kaba bha tam ïa kiwei bad wat ma u ruh u shim ba kane ka dei ka jinghikai kaba u ioh na kane ka shnong Tuber Kmaishnong bad ong ba kane ka dei ruh ka jingpynmlien ba bha kaba baroh ki nongshong ki dei ban shim kum ka nuksa.
U la ong ruh ba ka tnat CSR jong ka company Star Cement kan shim noh ïa kine ki plastik jot na shong Tuber Kmaishnong kiba la dep pynlang shi jaka ba la thep bha hapoh ki byrni bad rah noh shapoh karkhana ban thang pynduh pyndam noh ïa kine ki plastik jot ha ki pajwa ba rhem ne ki clink u la bynrap ruh da kaba ong ba “Lada ngi baroh ngin ïa snoh kti lang kawei khlem pep ngin lah beit ban pynduh pyndam ïa ki jakhlia plastik ba kin nym saphriang pathar ha shnong ha thaw bad ngin ioh ruh ïa ka mariang kaba khuid ba suba”
Na ka liang u Waheh Shnong Tuber Kmaishnong, u bah Jiedlang Sana u la ai khublei ïa ka company Star Cement kaba la shim khia ha kaba ka la wan ban shim ïa kine ki jakhlia plastik na shnong kiba la dep pynlum, pynlang bad dep pynkhuid lypa da ki nongtrei kiba trei ha katei ka jaka bret ñiut bad ong ruh ba ka Dorbar Shnong ka la buh haduh hynriew ngut ki briew ki ban trei ha katei ka jaka theh ñiut bad ïa kine ki nongtrei la siew tulop ïa ki da ka Dorbar Shnong.
“Ia kine ki ñiut ngi shu kit kyllum beit kumto na ki ïing briew kiba don ha shnong bad ynda la wanrah sha kane ka jaka bret ñiut kumba la dep bthah da ki bor shnong ki nongtrei kiba trei ki pyniakhlad ïa ki ñiut kiba pyut bad ki ñiut ki bym pyut bad thep ïa ki la ka jong, shuh shuh ha kane ka jaka theh ñiut ka don ruh kawei ka jaka ba la buh kyrpang ban buh tang ïa kito ki ñiut kiba pyut bad na kine ki ñiut ba pyut ki nongtrei ki pyn kylla sboh thung jingthung bad dei na ka daw ba ki nongtrei ki lah ban pyn iakhlad ïa ki ñiut kiba pyut bad kito ki ñiut ki bym pyut ba kane ka jaka ka khuid bad kam mih kano kano ka jingsma iw tung, ngi iohi bad sakhi ruh haba peit ïa ki nongtrei kiba trei kumjuh ruh kine kiba wan na ka compamy Star Cement kim donkam satia ban deng ïa ki jingda khmut, jingda shyntur ne ki mask namar kam don satia kano kano ka jingsma iw tung ha kane ka jaka” ong u Waheh Shnong.
Ha kajuh ka por, u Waheh Shnong u buh ka jingkyrpad ïa u khlieh ka district, u Deputy Commissioner kumjuh ruh ki nongmihkhmat ba kin sngewbha ban iarap lem ban pynioh ïa ka kali kit ñiut ha shnong khnang ban dup lah ban pynneh pynsah shuh shuh ïa ka khuid ka suba hapoh shnong namar ka khuid ka suba ka long kaba donkam haduh katta katta bad ong ruh ba ka shnong kam sngew lah kot bor shuh ban thied ïa ka kali kit ñiut namar ba ka jingpynlut ka la jur bha ha kaba siew ïa ki nongtrei ruh ha kaba ka shnong ka ju pynlut Laiphew hajar tyngka haduh sawphew hajar tyngka shi bnai tang ha kaba siew bainong ïa ki nongtrei ha kane ka jaka theh ñiut.
Na ka liang ka Dorbar Shnong ka angnud bad khmihlynti mynta ba kan ioh ïa ka kali kit ñiut kaba biang da ka jingshim khia lem u Deputy Commissioner bad ki nongmihkhmat.
