Shillong, Ïaïong 28: Ha ka sngi Palei ïa ka jingïalehkai Inter District U-19 Boys Cricket na ka Group A jong ka Zone 1 hapdeng ka Ri-Bhoi pyrshah ïa ka Shillong CA (B) la pynkit noh na kadaw ka jingpynthut jong u slap, ha kaba ka Shillong CA (B) kala ïoh rung suk sha ka final (zonal final).
Katba ka South Garo Hills kala pynliem da 5 wkt pyrshah ïa ka North Garo Hills ha ka jingïakhun jong ka Zone 2.
Ha kane ka sngi kaba dei ka jingïakhun group kaba khadduh ka Ri Bhoi ka donkam ban jop bun ron pyrshah ïa ka EKH ban kynjoh sha ka kyrdan ba hakhlieh na ka Group A lyngba ka run rate. Kala lah ban tied bha ha ka jingïalehkai kaba long ha Jowai ha kaba ka kamai 162 ron hap noh 6 wicket ha ki 22.3 over, hadien ba kala jop ïa ka jingkynting pisa bad kam ban tied nyngkong. Phewse na ka jingpynthut jong u slap ïa ka jingïalehkai la pynkut noh. U Reshab Subedi u kamai 59 ron na ki 42 bol da kaba khyrwit 8 tylli ki four bad ar tylli ki six katba u Raj Kishor Yadav u ïoh 2 wicket ai kamai 32 ron bad u Rahul Kumar 2 wicket ai kamai 47 ron.
Ha ka jingïalehkai ha Tura, ka NGH kaba la jop ïa ka jingkynting pisa kala kam trai ban tied nyngkong hynrei kala shah pynhap lut baroh ki wicket bad kamai 104 ron ha ki 30 over. U Chugrak Momin marwei u kamai 23 ron katba u Anikit Sarkar u khur 4 wicket ai kamai 7 ron ha ki 5 over bad u Sunbirth M Sangma u ïoh 2 wicket ai kamai 16 ron. Haba wan beh ïa katei ka thong, ka SGH ka duh noh 5 wicket ha ki 36 ron hynrei na ka jingkamai ron lang da 72 4on hapdeng u Salchang Sangma (56 not out) bad u Sunbirth (26 not out) ka kynhun kala khur ïa ka nam jop. Watla ka khur nam jop hynrei ka SGH kynthup ruh ka NGH ki khlem rung sha ka final.
Ha ka sngi Saitjaiñ, ka SCA (B) kan ïakhun pyrshah ïa ka All Jaintia CA ha ka final jong ka Zone 1 bad ka kynhun kaba jop kan ïakhun pyrshah pat bad ka East Garo Hills ha kane ka lympung kaban long ha ka 2 tarik u Jymmang.
