Shillong, Nailar 25 : U MLA ka Mawlai konstitwensi u Bah Process T Sawkmie hynne ka sngi u la noh synñiang da ka song pisa sha ka khynnah kaban leit ïakhun Wushu sha Kerela kaba u la aiti ha i kmie bad u kpa jong ka ha ophis treikam jong u ha Mawlai Nongpdeng hynne ka sngi.
Katkum ki kmie ki kpa ka Ibalakordor Umder ki la ïathuh ba ka khun jong ki kaba leit skul ha St, Joseph bad ba shong basah ha Mawlai Phudmuri kan mih ha ka 29 tarik u Nailar na Shillong ban leit sha Kerela ban ïakhun ïa katei ka jingïakob Wushu ryngkat bad ka kynhun kaba don kumba 19-20 ngut ki khynnah kiban leit ïakhun ban mih khmat ïa ka jylla.
Ha kajuh ka por u Bah PT Sawkmie kum shi bynta ban kyntiew ïa ka jingïalehkai kriket bad ban kyrshan ïa ka u la pynshna da ka pitch cricket bad noh synñiang ruh da ka song pisa na ka bynta ka Nongpdeng Cricket Team kaban shim bynta ha ka Maitshaphrang Khasi League Cricket Tournament ban pynlong shen da ka KSU.
Ïa katei ka pitch ne madan ban practice la pynshna markhap bad ka Indoor Hall jong ka Mawlai Nongpdeng bad ka song pisa kaba u Bah Sawkmie u ai jingïarap ka long ban thied ïa ki tiar ki tar jong ka jingïalehkai kriket jong ki.
