Ïarap ki Smartphones ïa ki khynnah skul bymlah ban ïohi ha ka thaiñ shatei lam mihngi

Shillong, Naitung 12: Ha ka sienjam kaba donkam eh na ka bynta ban pynkhlaiñ ïa ka pule puthi hapdeng jong ki khynnah skul ki bymlah ban ïohi ne shitom ka jingïohi, ka Vsion-Aid ha ka jingïartreilang bad ki jaka pule ka la sam haduh 42 tylli ki smartphones sha ki khynnah skul ha Shillong, Nagaon bad ha Guwahati.
Kat kum ka jingïathuh jong u V.L.Narasimhan, Executive Direcrtor, Vision-Aid India, u la ong ba kane ka kynhun jong u ka angnud ban ïarap ïa ki khynnah ba don jingshitom ki khmat lyngba ka jingpyndonkam da ki smartphones. Kane ka long ban pynïajan ïa ki sha kane ka pyrthei digital bad plie jingkhang sha ki lad pule na ka bynta ka laweri kaba phyrnai.
Kitei ki lai tylli ki jaka pule ba la lah ban pynïoh ïa ki jingïarap ki long ka Jyoti Sroat School, (Shillong), ka Srimanta Sankar Mission Blind High School (Nagaon) bad ka Guwahati Blind High School.
Ha Jyoti Sroat School, – kaba dei ka PM Shri School ba kyrshan da ka Bethany Society – 15 tylli ki smartphones la sam ha ka 30 tarik Jylliew sha ki khynnah ba pule ha ki klasVI haduh VII. Ha kane ka jingïalang la ïadon lang da u Mr. Swapnil Tembe, IAS, Secretary of Education ka sorkar jylla uba la pynshlur shaphang kumno ban kyntiew ïa ki lad pule da kine ki buit jingstad thymmai.
Ha kane ka sngi la ïadon lang ruh I Kong Bertha Dkhar (Padma Shri awardee) , Executive Director jong ka school, iba la pynshlur ïa ki khynnah skul ban shim khia ïa ka Braille bad ki bor ïarap ka digital. Ia ka program la pyniaid da ka Ms. Gargee Dutta, National Programme Manager ka Vision-Aids.