Shillong, Naitung 06: Ka Seng KSU Barak Valley, ka la trei borbah na ka bynta ban ïarap ïa ki lanot shle um ha Silchar kaba la jia ha une u bnai baladep. Ha kine ki sngi kiba ladep ka Seng ka la kner kti ruh lyngba ki lad jingïarap da ki marbam, ki jaiñ ki nep na ka bynta kine ki lanot, khamtam ïa ki paid Khasi ba shong ba sah ha katei ka jaka.
Ka kyrwoh ba la pyllait da ka Seng ryngkat ki dur bad ki video kiba pyni ïa kane ka jingkner kti ka Seng, ki pyni ba ki dkhot jong ka Seng ki la hiar sha ki shnong ki thaw, ki ïing ki sem jong ki paidbah ban ïarap ïa kito kiba la sahkut na ka jingshlei um.Nangta ki la leit ruh sha kawei ka skul Holy Cross ha kaba ki la pyndonkam da ki lieng kynda ban ïarap ban pyllait ïa ki khynnah skul bad ki nonghikai kiba sahkut ha skul na ka jingshlei um.
Ki dkhot jong ka Seng ruh ki la ngam da ka met ha ki jaka ba shlei um ban ïarap ïa ki paidbah kiba la sahkut ha ki ïing ki sem, ha ki dukan ban ïalam ïa ki sha kiwei pat ki jaka kiba lait na ka jingshlei um.
Lah ban kdew hangne ba ka Barak Valley kadei kawei na ki thaiñ hapoh Assam kaba la shah ktah bha ha ka jingshlei um namar ka jingjur u slap, kaba la ktah ruh wat ïa ka surok kaba pynïasoh ïa ka Meghalaya bad ka thaiñ jong ki them Barak, namar ka jingtwa bad jingdkut ka surok ha Sonapur bad ki Shnong ba marjan.
