Ïaphyliew jingmut kumno ba ki ADC kin long kiba biang ka rukom buh jingkheiñ ïa ka pisa

Shillong, Nailar 29: Kum ka jingïaleh ban wanrah ka jingtreikam kaba khlaiñ ha ka liang ka rukom buh jingkheiñ bad ka rukom lum bad pyllut pisa da ki Autonomous District Council, ka Meghalaya Institute of Governance (MIG), jong ka sorkar jylla ryngkat ka jingïatreilang bad ka Department of Economics, North Eastern Hill University (NEHU), ka la pynlong ïa ka Jingïa phylliew jingmut ba shi sngi ha Shillong halor ka phang “Strengthening the Finances and Financial Accountability of Autonomous District Councils in Meghalaya”.
Kane kadei ka sien kaba nyngkong ba ki nongmih khmat na District Council bad na ka sorkar jylla ryngkat ki riewshemphang ban ïakynduh bad ïatai halor ki mat kiba eh bha ha kaba ïadei bad ka rukom buh jingkheiñ jingdiah ki bor treikam kiba na jylla.
U Myntri ka tnad District Council, u Bah Lahkmen Rymbui u la long u Kongsan ha kane ka jingïalang bad haba kren ha kane ka jingïalang, u Bah Rymbui, u la ong ba ka long kaba donkam ha ka jingtreikam jong ka juk kaba mynta ba kino kino ki bor treikam ki dei ban biang ka rukom buh jingkheiñ jingdiah ha ka rukom lum bad pyllut pisa. U la ong ruh ba ki bor treikam kum ki District Council kidei ban long kiba khlaiñ ha ka jingtreikam ha ka rukom buh jingkheiñ jingdiah.
Ha kane ka jingïalang u Bah Titos Chyne, CEM ka KHADC, u la long u Kongsan Symbud.
Ki riewshemphang kiba la ai jinghikai ki long u Prof. V. N Alok, IIPA New Delhi, u Prof Sumarlin Umdor, na ka Department of Economics, NEHU bad u Bah Tornado G. Wanniang, Sr. Audit Officer & Core Faculty, Regional Training Institute (IA & AD), Shillong.