Shillong, Lber 19 : Ki paidbah ba wan sha ka jingdie bad pyni nam ïa ki mar ba wanrah da ki SHG bapher bapher ha phyllaw State Central Library Shillong ha kane ka sngi Balang bun ki la ïapbiej ban ïohi ïa ka jingdon ki shriew kiba heh ba heh ba wanrah da ka Roilang SHG na Tongseng Nongkhlieh, ka shnong kaba don ha East Jaintia Hills District.
Katkum ka jingïathuh da ka Secretary jong kane ka SHG, Kong Prettysilva Pajuh, kine ki jait shriew lada shu thew kilo kin poi beit sha ka 3kilo tam kawei bad kaba rit eh ruh la ong ba kan poi ym duna ïa ka shi kilo tam.
Haba ïa kren bad u Mawphor, ka la ïathuh ruh ba ki don arjait kine ki shriew heh ha kaba uwei u long pyllun bad uwei pat u jait u long kham jrong hynrei kine baroh ar tylli kidei kiba bang ban bam.
“Baroh ar jait ki dei kiba bang ban bam la ka long ban bam por ba dihshwa bad ruh wat ban shet jyntah,” ka la ïathuh.
Ha kajuh ka por pat ka la pyntip ba kine ki jait shriew ki ih kloi lada shet naba tang hapoh shi kynta ki la ih. Kaba mut bad ki ïapher bad kiwei pat ki jait shriew ha ki thain war Sohra ha kaba ki paidbah ki hap ban shet baroh shimiet ba kin ih.
“Ki briew jongngi ki dang bun bha kiba rep ïa une u shriew bad kiwei pat ki jait jhur bad ki buh skul bad kumjuh ki tei iing tei sem da kaba rep jhur bad die jhur,” ka la bynrap biang.
Haba jubab halor ka jingkylli, ka Kong Pretty ka la ïathuh ba ïa ki jhur kumjuh ïa ka shriew ba ki pynmih na ka thain ki ju leit die beit sha iew Sutnga lane sha Khliehriat ha kaba ki paidbah ba bun ki kham noh mynsiem ban thied.
“Kumba long haduh mynta, ki dang don bun bha kiba rep ïa une u shriew bad ka jingdawa ruh ka dang bun bha namar u ïaid iew,” ka la bynrap biang.
Tangba, ka la pynpaw pat ba lada ka sorkar ka don ka lad ban pynïaid iew ïa une u jait jingthung uba pawnam ha ka thain lehse kan long ka jingïarap kaba kham khraw ïa ki nongshong shnong jong ka thain. “Ngi kyrmen ba ka sorkar kan plie lad lada ka don na ka bynta ban pynkhlain shuh shuh ïa ka jingrep jong une u mar rep.”
Ha kane ka sngi, ka Kong Pretty ka la ïathuh ruh ba ki don bun ki mar rep kiba kham long pher bad kyrpang kiba ki pynmih na katei ka thain. Uwei pat u jait jingthung dei u khaw saw uba katkum ka jingïathuh jong ka, u kham bang bad u kham shngiam bad ka dor ruh ka kham rem ban ïa kiwei pat.
Lyngba kane ka SHG la pyni paidbah ruh ïa ki lai jait ki phankaro, kata u phankaro saw, phankaro stem bad u phankaro lieh nalor ki kynja nei bad kiwei ki jingbam symbai.
