Jowai, Risaw, 09: Ka jingïakynad ha khappud Meghalaya bad Assam ka la bthei biang ha kaba uwei u rangbah na ka jaidbynriew Karbi u la ïap ha ka jingïakynad hapdeng ki jaidbynriew Karbi na ka shnong Tahpat, West Karbi Anglong District bad ki Khasi Pnar na ka shnong Lapangap ha ka sngi Palei.
Kane la jia ha ka sngi Palei katba ki Khasi Pnar ki dang leit ot ïa u kba na ki pynthor kiba don shajan ka shnong Tahpat.
Ka khubor ba la pyntip da ki Pulit ka West Jaiñtia Hills, la ïathuh ba kane ka jingjia ba sngewsih ka la jia mynta ka step katba ki nongrep Khasi Pnar ki dang ot ïa u kba ha ka shnong Lapangap ryngkat ka jingsynran lang jong ki Pulit ka Meghalaya bad ki Pulit ka Jylla Assam.
“Ka jingïakynad ka la mih kynsan hapdeng ki nongshong shnong ka Lapangap, Meghalaya bad ki nongshong shnong ka Tahpat, Assam,” la ong ki Pulit.
“Ha ka jingïakhun, uwei u rangbah Karbi ba la tip kyrteng kum u Orivel Timung, 45 snem eiei ka rta na ka shnong Tapat Karbi Anglong ula khlad noh. Kam shym la don kano kano ka jingpyndonkam ïa ka bor da ki Pulit na baroh ar liang,” ki la ong bad bynrap, “kumba ka paw ka jingïap (jong u Orivel Timung ka dei na ka jingïapynibor hapdeng ki nongshong shnong (ka Lapangap bad ka Tahpat.”
Hadien kane ka jingjia, ki Pulit ki la pyntip ba la hap ban pynsangeh noh ïa ki nongrep ban leit ot ïa u kba tad haduh ban da pynbna da kumwei pat.
Namarba ka jingjia ka dei kaba hap shapoh u pud u sam jong ka jylla Meghlaya ïa ka case la rejistar ha Nartiang Police Station hapoh ka Section-103(1),117(3),117(4),119(1),121(1),121(2),189(1)-191(3),195(1),195(2),329(1),331(5), 332, 333 BNS.
Kane ka jingïakynad ka la jia hadien ba ladep pynlong ïa ka jingïalang jong ka Inter State Border Peace Committee ha ka 6 tarik mynta u bnai.
U Waheh Shnong ka Lapangap Bah Deimonmi Lyngdoh ha ka jingïakren bad u Mawphor lyngba ka telephone u la ïathuh ba ka jingïalang jong ka Inter State Border Peace Committee kam shym la poi shano shano ruh namarba ka shnong Lapangap ka la kyntait mardor ïa ka jingdawa jong ki Karbi ban shah pom dieng ha lum pynthor, ban register ïa ki Patta khyndew bad ïa ka Land Holding Certificate sha ka jylla Assam bad ban shah ruh ïa ki ban sieh ïa ki Boundary Pillar.
Haba kylli, u Waheh Shnong u la ong, ki don bun ngut ki nongshong shnong ka Lapangap kiba la mynsaw na ka jingshah siat da ki jri siat sim ha ki Karbi.
U la ïathuh ba mynta ka sngi, sa kumba 50 ngut ki Pulit ka West Jaiñtia Hills ki la wan poi ha Lapangap ban ai jingïada ïa ki nongrep kiba leit ot kba sha pynthor shajan ka shnong Tahpat nalor ki 30 ngut ki Pulit kiba la don lypa ha ka shnong Lapangap.
Katkum ka jingong jong u, ki pynthor kiba don shajan ka shnong Tahpat ki don kumba 30-35 Patta bad ki nongrep Khasi Pnar ki duh jingkyrmen bha namarba kim ïoh lad satia ban leit ot ïa u kba.
Haba kylli halor ka jinglong jingman na kane ka jingjia, u Waheh Shnong u la ong ba ïa mynta ki Pulit ki la peitngor bha ïa ka shnong ka thaw ryngkat ka jingdonlang jong u Border Magistate u Bah HD Passah.
