Ïap uwei ha ka jaka tih dewïong ha Umthe EJHD, kem noh ki pulit ïa uba suba donkti

Khliehriat, K’Lyngkot 18: Uwei u briew uba la tip kyrteng kum u Mosaid Ali, 48 snem kyrta uba dei u khun jong u Riyasad Ali uba na ka shnong Jamuna Moudanga Nagaom, Hojai District, Assam la ong ba u la iap ha ka por ba dang trei ha kawei ka par dewïong kaba don ha Umthe, Elaka Sutnga, East Jaiñtia Hills.
Halor kane ki pulit ki la kem noh ïa uwei u briew uba kyrteng u Sahanaj Uddin, uba na Bhairabpur Pt- II, PO Kalain, District- Cachar, Assam bad ïa une u briew ki pulit kin sa rah sha ïingbishar la shai ka sngi bad kin sa pan jingbit na ka ïingbishar ban pynlong ia ka jingtohkit.
Halor katei ka jingjia la pyntikna ruh da u Superintendent of Police East Jaiñtia Hills District, u u Vikash Kumar, IPS bad ong ba kane ka jia myn ha ka 14 tarik mynta u bnai Kyllalyngkot bad utei uba khlad u la khlad noh ha katei hi ka sngi ba jia da kaba ong ba ka lah ban don kaei kaei kaba khia kaba hap halor jong u haduh ba un da kynduh ia katei ka jingjia ba sngewsih.
Na ka liang u Superintendent of Police East Jaiñtia Hills District u la ong ba u la phah pulit sha katei ka jaka ban khang noh ïa kane ka jaka tih dewïong kaba long pyrshah ïa ka aiñ bad halor kane ka jingjia na ka liang ki pulit ruh ki la register ejahar ha Khliehriat Police Station.