Tura, Jylliew 06 : Uwei u samla ba 21 snem, ula iap na ka jingthombor jong u Hati ha South Garo Hills katba u dang wan phai shala ïing na ka ïing iap briew ha Alokpang, South Garo Hills ha ka miet sngi Nyngkong.
Kane ka jingjia kala jia ha ka por 11 baje mynmiet katba une u samla ba kyrteng u Sengkam R Marak, u dang ïaid lynti sha la ïing hadien ba mih na ïing iap briew. Ula ïakynduh ïa u hati ha surok ba don harud ka Wah Simsang,kaba jngai kumba 30 km na sor Baghmara.
U Hati ula thombor ïa une u samla bad ula kyrdem ïa u haduh da iap hashuwa ba un phet sha khlaw. Ki Pulit ki la leit ban shimti noh ïa ka met.
Ki Hati khlaw ki ju shang kylleng ki khlaw ka South Garo Hills ban wad jingbam bad bunsien ki ju leit rung sha ki shnong briew ha ka por ba duna bam ha khlaw kata hapdeng u bnai Naiwieng haduh u bnai Jymmang.
