Shillong, Naiwieng, 11: Uwei u rangbah uba la tip kyrteng kum u Bhim Singh Lyngdoh Nongbri, 46 snem ka rta u la mynsaw jur bad khladnoh hadien ka jingshah dung tari ha uwei u rangbah uba la tip kyrteng kum u Libokstar Suting ha ka 9 tarik mynta u bnai.
Katkum ki jingjia ba la pynmih ha ka website da ka tnat Pulit, la pyntip ba kane ka jia ha ka shnong Mawpyrshong, East Khasi Hills District.
Ïa u Bah Bhim Singh uba la mynsaw jur la pynkit noh sha Supercare Hospital, Shillong, ha kaba u Medical Officer u la pyntip ba u ladep khlad lypa. Halor kane ka jingjia, ki Pulit ki la kem ïa uba shah kynnoh.
Ha ka step 10 tarik mynta u bnai, u Shubam Shrestha Pradhan u la pyntip sha ki Pulit ka Laitumkhrah Police Station ba lai ngut ki runar ki bym lah ban ithuh durkmat ki la beh thong ïa u bad uwei u Alok Sangma hajan Seven Set School, Shillong bad pyrshang ruh ban ïashoh bad ki. Hynrei, ki la lait phet da ka said, bad iehnoh shadien ïa ka Scooter jong u kaba don ïa u nombar ML-05Q-8247 bad kawei ka mobile phone, ha kaba kham hadien ba la lap ba kine ki tiar ki la jah na ka jaka ba ki don.
Kawei ka longkmie ka la ujor sha ki Pulit ban pyntip ba ha ka 7 tarik mynta u bnai ha ka por kumba 6.30 baje janmiet, uwei u briew bym lah ban ithuh durkhmat u la shoh ïa u kurim jong ka ha kawei ka kali Maxi Cab ha Khyndai Lad, Shillong.
