Sivasagar, K’Lyngkot 7: U wei u briew uba 41 snem ka rta u la khad noh h aka jingshah siat ha ki pulit ha ka miet sngi ba-ar ha Sivasagar district jong ka jylla Assam hadien ba la leit ban thombor ïa u para marjan da ka wait bad hadien u la pyrshang thombor sa ïa ka kynhun ki pulit kiba la poi ha katei ka jaka ban tem ïa ka jinglong jingman, la ong ki heh pulit.
Kane ka jingjia kala jia ha Bordiroi Tea Estate kaba don ha ka thain Demow.Ïa une u briew ba la khlad la tip kyrteng kum u Ranjit Pandov, uba dei na kane kajuh ka shnong.
Katkum ki pulit, u Pandov, uba la kynnoh ba u la buaid kyiad pyrsi ba la shna ha katei ka jaka, kaba la tip kum ka sulai, bad u la pynmih ïa ka jingkulmar ha katei ka dong, ha ka por kumba 8.30 baje mynmiet. Haba ki para marjan jong u, u Mortin Pandov bad ka tnga jongu, ka Geeta Pandov, ki la kyrpad ïa u ban sangeh noh ïa katei ka jingthaw pynklumar namar ba ka khun jong ki, ka dang pynkhreh ïa ka eksamin Class 10, la kynnoh ba u lakylla long khluid shuh shuh bad u la sdang da kaba thombor bor ïa kid a ka wait.
U Mortin, u la mynsaw jur na ki bynta u ryndang, katba ka Geeta, ka la mynsaw na ki bynta jong ka kjat. Ha kaba nyngkong la pynkit mar mar ïa kine baroh arngut sha Demow Model Hospital bad hadien pat la pynkynriah noh sha Assam Medical College and Hospital (AMCH), Dibrugarh, na ka bynta ban ïoh ïa ka jingsumar kaba kham bha.
Ki tyllong khubor na hospital, ki ïathuh ba u Mortin, u dang don hapdeng ka jingshitom kaba jur ha ICU, katba ka Geeta, ka lait na ka jingma.
Ki pulit ki la iathuh ba ki dkhot Village Defence Party (VDP) ki la pyrshang ban teh lakam ïa u Pandov, hynrei u la pyrshang ban thombor kylla ïa ki ruh kumjuh, kaba la pynlong ïa ki ban pan jingïarap na ki pulit. Ki pulit na Demow Police Station, ba kynthup ïa ki pulit kynthei, ki la poi sha katei ka jaka bad ki la pyrshang ban pynjem ïa u.
“Haduh 40 minit eiei, ka kynhun jong ngi ka la pyrshang ban pynsngewthuh ïa u, hynrei u la nang kham long khor bad u la beh ïa ki pulit da ka waitlam”, ong u Demow Co-District Superintendent of Police u Hiren Kumar Deka.
“Haba u la ïaid shakhmat sha uwei u pulit commando ryngkat bad katei ka tiar, la siat ar tylli ki kuli kum ka jingmaham.Katba u dang ïaid shakhmat, la siat biang sa ar kuli na ki bynta jong ka kjat.U la shah siat ha ka tyrpeng”, la bynrap biang u Deka.
Ïa u Pandov la ïalam noh sha Demow Model Hospital ha ka kali ki pulit namar ka jingbym ïoh kali kit nongpang bad hadien la pynkynriah noh sha AMCH, ha kaba ki doctor kila pynbna ba u khlad noh ha ka por ba wanrah ïa u.
Ki tyllong khubor na ki pulit ki iathuh ba u Pandov u dei uba la kyrni bha ha ka kyiad bad uba ju thombor ruh ha ïing ha sem.La iathuh ba ka lok jong u bad san ngut ki khun-uwei u khun shynrang bad saw ngut ki khun kynthei-ki la mih noh na ïiing ar sngi mynshwa namar ka jingshah thombor man ka por.
