Nongpoh, Naitung 12: Kawei ka heprit kala duh noh syndon ïala ka jong ka jingim bad 2 ngut kiwei pat kila mynsaw jur haka jingshah bat bording elektrik hadien ba uwei u sainar elektrik u la hap ha madan ha kawei ka khlaw kaba don hajan MIDC Umïam, Ri-Bhoi District.
Katkum ka jingtip bala ïoh lum la ong ba kane ka jingjia kala jia mynta ka sngi haka por 12 baje eiei katba katei ka heprit kaba la khlad noh kaba la tip kyrteng kum ka Mikkinchi Momin 13 snem ka rta ka dang kala mih nala ïing ryngkat bad Nikgrichi I Sangma 13 snem kyrta bad u Chuchang I Sangma ba 8 snem kyrta ban leit kheit sohphan na kawei ka khlaw ba marjan, hynrei ha katei ka jingïaid lynti jong ki, kila ïoh ïuh pynban ïa uwei u sainar elektrik u ba dang don bording (11KV) u ba la hap ha madan bad naka jingkhlain ka bording kala kynjat ïakitei ki heprit haduh ba katei ka MikinChi Monin kala duh noh syndon ïala ka jingim bad kitei ki 2 ngut kiwei pat kila mynsaw jur na katei ka jingjia.
Ïa kitei ki heprit bala mynsaw na katei ka jingjia la pynkit noh mar mar sha Civil Hospital Shillong ban ïoh ka jingsumar.
Halor katei ka jingjia naka liang ka KSU Umiam Unit lyngba u Samla Markus Nongkhlaw kala pynrem jur ïaka tnad MeECL ba dei ka jingtorti jong ka, ba katei ka heprit kala hap ban duh noh syndon ïala ka jingim bad pynmynsaw ruh 2 ngut khlem da weng ïa utei u sainar elektrik ba khlain bor u ba la hap ha madan mynta la bun bnai haduh ban wanrah katei ka jingjia ba sngewsih.
Naka liang ka KSU kala dawa ruh naka tnad MeECL ba ka dei ban shim ka jingkitkhlieh halor katei ka jingjia bad ban pynbiang ruh ki jingsumar sha kitei kiba mynsaw bad kiba dang don hapdeng ka jingshah sumar.
