Shillong, Risaw, 24:Uwei u samla uba la 21 snem ka rta na ka shnong Nongkseh Block-V, Laimer, East Khasi Hills u la ngam jyllop ha ka wah Lyngngam.
Ïa une u samla la ithuh kyrteng kum u Ricky Thangkhiew, uba dei ruh u samla pule jong ka Synod College, Shillong.
Kane ka la jia ha ka janmiet sngi Palei, 23 tarik mynta u bnai, katba u samla Ricky Thangkhiew u dang leit bam khana bad la ki paralok kiba ïa pule lang.
Hynrei katba u dang shondur hajan ka wah, u la hap kynsan sha um bad ngam jyllop syndon.
Tang shu ïoh jingtip halor kane ka jingjia, ki Pulit bad ka kynhun Search and Rescue Team (SRT) na Shillong ki la leit mar mar ban sei ïa ka met jong u samla na wah.
Mynta ki Pulit ki dang pynlong ïa ka jingtohkit kaba bniah halor kane ka jingjia.
