Nongpoh, Nailur, 25: Ha kawei ka jingjia aksident kaba shyrkhei kawei ka thuk thuk kaba don ïa u registration Number ML 05 Y 3698 kaba wan ïaid na ka jaka bym dei (Wrong side) ka la leit ban tynrah ïa kawei ka bus kaba don ïa u Registration Number AS 01 GC 3288 haduh ba kan da kem ding bad ingkhong khait.
Kane ka jingjia aksident ka la jia hynnin ka miet ha kapor 10 shiteng eiei ha surok bah jong ka sor Nongpoh kaba don mar shilliang bad ka Civil Hospital, ha kaba katei ka bike kaba ïaid na liang bym dei ka la leit ban tynrah na khmat jong katei ka Bus ka ba wan na Guwahati bad leit sha Shillong haduh kaba la pynlong syndon ïa ka bike ba kan bthei bad pynlong ruh ïa ka bos ban kem ding lang haduh ban da ingkhong khait.
Ha kane ka jingjia u nongñiah jong ka thuk thuk u ba la tip kyrteng kum u Barista Mylliemngap 29 snem ka rta na Umsawkhwan, Ri-Bhoi District u la khlad hajuh hadien ba ka ding ka la bam duh ïa u katba ki nongleit nongwan kiba shong ha katei ka bos ki la lait im na katei ka jingjia bad kim shym don mano mano ba mynsaw katba u nongñiah jong katei ka bos ym shym la lap dien shuh ïa u ha katei ka jaka.
Na ka liang ki bor pulit pynlip ding lem bad ki pulit na Nongpoh Police Station ki la poi ha katei ka jaka ban tem iaka jingklang jong katei ka ding kaba la bam duh ïa ka thuk thuk bad kumjuh ruh ïa ka bos bad hadien ba ki la ïoh ban sei ïa ka met jong u nongñiah thuk thuk mar mar ki la pynkit noh sha ha Civil Hospital Nongpoh ban leh ïa kaba donkam.
Haba ïoh ban ïa kren bad ki katto katne ngut ki nongleit jingleit kiba shong ha ka bos ki la ïathuh ba mar sien ïoh sngew ïa ka jingbtei bad ïohi ïa ka jingklang ka ding ki la kyndit bad ki la shu ïaleh ban mih shabar ka bos bad don ruh napdeng jong ki ki hap ban shu jump na ki jingkhang iit tang ban lait im na kano kano ka jingjia ba sngewsih.
Lyngba katei ka jingbthei bad kemding katei ka bos ka la wanrah ruh ka jingdheng kali kaba jur shipor ha surok bah National Highway tad haduh ba ki pulit ki la trei shitom ryngkat ki pulit pynlip ding ban pynlip ïa ka ding ba klang bad ban tan noh ïa ka bos kaba la ingkhong na katei ka jaka.
