ïap hashen u samla ba syllad ka kali synran ïa ki heh ki haiñ sha tamasa Cherry Blossom

Shillong, Naiwieng 15 : Uwei u samla ula duh ei ïa la ka jong ka jingim bad kawei pat ka samla ka la mynsaw jur haba ka thuk thuk kaba ki shong ka la shah syllad ha ka kali kaba synran ïa ki heh ki haiñ kiba ïabeh ban leit sha ka tamasa Cherry Blossom ha Bhoirymbong Ribhoi District ha ka janmiet sngi Thohdieng.
Katkum ka khubor ba la ïohlum na ki Pulit la ïathuh ba kane ka la jia ha ka por 5:30 baje eiei janmiet ha ka thain Umsaw hajan ka ophis ICAR.
Ka thuk thuk ba shong kine ki samla ka dei kaba don u nombor ML05-AD-0566.
Ki Pulit ki ïathuh ba ïa une u samla ba khlad la tip kyrteng u H. Rymbui uba dei na ka shnong Nongtalang, West Jaiñtia Hills District.
Ïa kine ki samla la pynkit noh sha Holy Cross Hospital kaba don ha Umsaw, Ribhoi District hynrei ki doktor ki la pynbna ba u samla H. Rymbui ula khlad noh na kane ka sla pyrthei.
Ki Pulit ki la register case halor kane ka jingjia bad ka jingtohkit mynta ka la ïaid shakhmat.