Nongpoh, Naitung 01: Ki ar ngut kiba shong da ka Scooty ki la duh noh ïa la ka jingim hashen, kaba dei hadien ba katei ka Scooty kaba ki shong ka la shah tynrah ha kawei ka Trok katba ki dang jam sha shiliang ka surok ha Umsamlem.
Kane ka jingjia ka la jia hynnin ka miet ha ka por 11 baje ei ei mynmiet, ha kaba kitei ki ar ngut kiba shong da ka Scooty ki la thmu ban jam sha shiliang ka surok bad kynsan kynsan ki la shah tynrah ha kawei ka trok haduh ba ki la mynsaw jur bad duh syndon ïa la ka jingim.
Kine ki ar ngut kiba la duh noh ïa la ka jingim ha kane ka jingjia ba sngewsih ki kynthup ïa u Samla ba la tip kyrteng kum u Pynshailang Wahlang bad u Banïalambha Lyngdoh kiba dei na ki nongshong shnong ka shnong Umgnet ha Ri Bhoi.
Kumba la ioh lum jingtip na ki bor pulit ka Ri Bhoi, la ong ba katei ka trok kaba tynrah ïa kitei ki ar ngut ka don ïa u number UP 76-K- 8582 ha kaba u dribar u la phet krad ïa lade hadien katei ka jingjia bad katei ka Scooty ba la shong da kitei ki ar ngut pat kiba la duh ïa la ka jingim kam pat shym la don number satia (A/F).
La ong ruh ba ïa kine ki ar ngut la rah noh sha ka jaka buh met ïap ha Civil Hospital Nongpoh bad na ka liang ki bor pulit ka Umsning ki dang pynlong ïa ka jingtohkit ban leh katkum ki kyndon jong ka aiñ halor kane ka jingjia.
