Nongpoh, Naiwieng, 03: Ar ngut ki samla ba la suba ruh ba ki dei shijur ki la khlad noh hashen hadien ba ki la shah iuh ha kawei ka trok ha surokbah National Highway-6 ha ka shnong Shangbangla, Ri-Bhoi District.
Kane ka la jia ha ka step Sngi u Blei ha ka por kumba 9:48 baje eiei ha kaba kawei ka thuk thuk Royal Enfield kaba don ïa u nombar AS 01 FF 3367 ba la ñiah da u Nilutpal Dowari 23 snem ka rta ryngkat bad kawei ka samla kaba la tip kyrteng kum ka Gargee Chutia 21 snem ka rta kiba dei na ka jylla Assam bad kiba dang thmu ban wan kiew sha nongbah Shillong ki la ngat pynban ha ka jingjia ba sngewsih hadien ba u nongñiah jong ka thuk thuk u la pynher sted bad leit ban tynrah beit nadien jong ka trok kaba dang ïaid kaba don ïa u Registration Number AS 01 RC 0413 hadien ba u knieh ïaid shakhmat. Ha kane ka khyllipmat, ka thuk thuk ka la rung syndon sha khrum jong ka trok kat haduh ba ka trok ka la iuh throit hajuh ïa kine ki arngut bad khlad noh syndon hashen.
Ki Pulit jong ka Nongpoh Traffic tang shu ïoh jingtip halor kane ka jingjia ki la leit marmar sha katei ka jaka ban pynlong ïa ka jingtohkit kaba bniah bad pynkit noh ïa ki arngut ki samla sha ka jaka buh metïap ha Nongpoh Civil Hospital.
Ki Pulit ki la pyntip ruh ïa ki bahaiing hasem jong kine ki arngut ki samla kiba la khladnoh ba kin wan mih mardor sha thanad Nongpoh na ka bynta ban shimti ïa ka met ynda la pyndep ïa ki jingdonkam baroh katkum ka aiñ. Nalor kane ka jingjia, shibun kiwei pat ki jingjia aksiden ki la jia ha kane kajuh ka sngi ha ka thaiñ Ri-Bhoi kaba la wanrah ruh ka jingjulor ki kali bad ka jingmynsaw jong ki briew.
