Nongpoh, Naitung, 07: Arngut ki briew ba kynthup ïa u nongñiah jong ka kali puhshilum ki la duhei ïa la ka jong ka jingim hadien ba ka kawei ka kali Tata Trok ka la tynrah ïa kawei ka puhshilum ba la pynieng harud surok ha ka shnong Khapmara, ba hap ha ka surok Shillong By-pass.
Kane ka la jia ha ka sngi u Blei ha ka por kumba 3.30 baje mynstep ha kaba la ïathuh ba ka kali Tata Trok kaba don ïa u Number BR06-GE-5655 ka leit ban tynrah kynsan ïa ka puhshilum kaba don ïa u number ML05-W-1708 bad u nongñiah jong ka puhshilum ryngkat bad uwei paralok ba ieng hajan ki la mynsaw jur bad la pynkit noh marmar ïa ki sha CHC Bhoirymbong bad hadien ba la poi ha ka jaka ai jingsumar la pyntip ba ki arngut ki la khladnoh na ka jingjur shaba palat ka jingmynsaw.
Kine ki ar ngut kiba la khladnoh ki kynthup ïa u nongñiah jong ka puhshilum ïa uba la tip kyrteng kum u Batiplem Suting 28 snem na ka shnong Langkyrdem, East Khasi Hills bad uwei pat la tip kyrteng kum u Slibor Kharbani 25 snem na ka shnong Nongdom Umïap, Nongstoiñ, West Khasi Hills.
U Superintendent of Police jong ka Ri Bhoi District u la ïathuh ba ka kali Tata Trok ka dei kaba dang wan na Guwhati ban leit sha Lad Rymbai, hynrei ynda haba la poi ha Khapmara ka la leit ban tynrah kynsan ïa ka puhshilum.
La ong ruh ba u nongñiah jong ka Tata Trok hadien ka jingjia u la phet noh ïalade.
Ïa ki ar ngut kiba la mynsaw jur bad la khladnoh ynda la poi ha CHC Bhoirymbong la rah biang ïa ka met sha Civil Hospital Nongpoh ban pyndep ïa ka Postmortem.
Ki Pulit jong ka Ri Bhoi ki dang pynlong ïa ka jingtohkit kaba bniah ban ïohkem ïa u nongñiah jong ka Tata Trok bad ha kajuh ka por ruh ki la pyntip sha ki bahaïing jong ki arngut ki lanot ban leit mih sha PIC Khapmara khnang ban ïoh ban pyndep ïa ki jingdonkam katkum ki kyndon aiñ.
