Kabul, Risaw 18: Ym duna ïa ka lai ngut ki nongïalehkai kriket na Afghanistan ki la ïap ha ka jinghiar thma ki liengsuiñ ïapom jong ka Pakistan ha ka Jylla Paktika. Ka Afghanistan Cricket Board (ACB) ka la ïathuh ba kitei ki nongïalehkai ki la leit na Urgun sha Sharana kaba don ha ka thaiñ Mihngi jong ka Paktika kaba don ha khappud ka Pakistan ban ïashim bynta ha kawei ka jingïalehkai paralok.
Ka ACB ka la pynbna ba kine ki nongïalehkai kidei kiba la tip kyrteng da u “Kabeer, Sibghatullah bad u Haroon” bad la ïathuh ruh ba san ngut kiwei pat ki briew ki la ïap ruh ha katei ka jingshah thombor
Ka la ong ba “hadien ba ki la wanphai sha la ïing ha Urgun, ki la shah thombor ha ka por ba ki dang ïalum lang “ha kaei kaba ka la batai kum” ka jingshah thombor kaba shyrkhei kaba la leh da ka sorkar Pakistan”. Ka ACB kam shym la ai jingtip shuh halor katei ka jingshah thombor.
Hadien kane ka jingshah thombor, ka Afghanistan ka la weng noh ïalade na ka lympung ïalehkai jong ki lai tylli ki ri bad ka Pakistan bad ka Sri Lanka ha u bnai ban wan. “kum ka dak ïa jingburom ïa ki nongshah thombor”.
“Ka Afghanistan Cricket Board ka pynpaw ïa ka jingsngewkhia bad jingsngewsih halor ka jingshah pynïap ba sngewsih jong ki nongïalehkai kriket ba shlur na Urgun District jong ka Jylla Paktika, kiba la shah pynïap mynta ka janmiet ha ka jingthombor kaba shyrkhei kaba la leh da ka sorkar Pakistan.” la thoh ka ABC ha a kyrwoh ha ka rynsan X jong ka.
U kapten jong ka kynhun T-20 jong ka Afghanistan, u Rashid Khan, u la pynrem jur ïa ki jingshah thombor ba dang shen bad u la pdiang sngewbha ïa ka rai jong ka ABC ban weng noh ïa lade na ka jingïalehkai paralok.
“Nga dap da ka jingsngewkhia bad sngewsih jur halor ka jingduh noh ïa ki jingim jong ki riew paidbah ha ki jinghiar thma ki liengsuiñ ïapom ba dang shen jong ka Pakistan ïa ka Afghanistan. Ka jingjia ba sngewsih kaba la shim ïa ka jingim jong ki kynthei, ki khynnah, bad ki nongïalehkai kriket samla kiba thrang ban mihkhmat ïa la ka jaitbynriew ha ki lympung ïalehkai bari ri,” u la ong ha ka rynsan X jong u.
U Khan u la ong ba ka long kaba khlem akor bad kaba shyrkhei ban thombor ïa ki jaka jong ki riew paidbah, bad kum kine ki “jingleh bym hok bad be-aiñ ki pyni ïa ka jingpynkheiñ kaba jur ïa ka hok longbriew manbriew bad kim dei ban shu jah khlem da shah bishar.”
“Nga pdiang sngewbha ïa ka rai jong ka ACB ban weng noh ïa lade na ki jingïalehkai ban wan pyrshah ïa ka Pakistan. Nga ieng ryngkat bad ki briew jong ngi ha kane ka por kaba sngewsih, ka ri bad ka jaitbynriew jong Ngi kadei ban wan hakhmat ban ïa kiei kiei baroh,” u la bynrap.
U Mohammad Nabi, u la bynrap, “Kane ka jingjia kam dei tang ka jingsngewsih ïa ka Paktika hynrei ïa ka longiing kriket Afghan baroh kawei bad ïa ka jaitbynriew hi baroh kawei.”
