ïap 3 ngut ba bam tit, lap ïa ki met la la sma na ka ïing ba dang shna na New Shillong

Shillong, Naitung, 10: Lai ngut ki briew ki la ïap,kynthup ia kawei ka kynthei, bad ïa ki met ïap jong ki la lap na ïing ba dang shna jong ka Institute of Science and Bio Resource (ISBR) ha ka shnong Umsawli, ha ka janmiet sngi U Blei.
Ia kine ki lai ngut, la tip kyrteng kum ka Kong Sheba Kharbani 40 snem ka rta, kaba trei kum ka cleaner, u Bah Rupert Donbor Dohtdong, 43 snem, bad u Blackstar Kharkrang 30 snem. Baroh lai ngut kidei kiba shong ba sah sah ha Mawlai Phudmawri.
La lap ia kine ki metiap na kane ka jaka, hadien ba la mih ka jingsma na kane ka ïing ha kaba ki paidbah ki la pyntip mar mar sha ki bor pyniaid shnong jong ka shnong Umsawli.
Ia ka met jong ka Kong Sheba la lap na kawei ka kamra katba ia ka met jong ki arngut kiwei pat la lap na kawei ka kamra.
Ki Pulit kiba la pynlong ka jingtohkit, ki la lap kine ki lai ngut ki la bam ïa u tit uba buid ba ladep shet bad la antad ba ki la kheit na ka khlaw kaba don hajan.  Ki Pulit ki la lap ruh ia u tit baladep shet ha u khiew ha kawei na ki kamra.
Hadien kane, ka kynhun ki Pulit jong ka Crime Scene Unit ki la leit mar mar sha kane ka jaka ban pynlong ia ka jingtohkit kaba bniah.
ïa ka met jong ki la pynkit noh sha NEIGRIHMS Hospital ban leh ia ka post-mortem bad ki Pulit ki la register case ruh halor kane ka jingjia.