Hyderabad, Jymmang 19 : Ki la don haduh 17 ngut ki briew kynthup ïa ki phra ngut ki khunlung bad hynriew ngut ki longkmie kiba la duhei ïa ka jingim hadien ba ka ding kaba khlain bha ka la bamduh naphang ïa ka iing ba ar mala kaba don hajan Charminar ha Hyderabad ha ka step sngi U Blei.
Na ka liang u Director General of Police, Dr. Jitender u la ong ba katkum ki jingtohkit ba ki dang ïoh lum malu mala ki kdew ba ka lah ban dei na ka jingthut ha ka bording kaba la poi sha ka jingkem ding ka iing kaba pynlong ïa ki phra ngut ban khlad na ka daw ka tdem. Katba kiwei pat kiba khlad ki dei na ka jingmynsaw.
Halor kane ka jingjia na ka liang u Myntri Rangbah ka Jylla, Narendra Modi u la phah ka jingsngewlem halor ka jingduh ei ki mynsiem ha katei ka jingpluh ding ha Gulzar House ha Hyderabad Telangana kaba la shim haduh 17 ngut ki mynsiem briew.
Ha ka kyrwoh lyngba ki social media, u Myntri Rangbahduh ka Ri u la pynbna ruh ban ai bai luksan haduh 2lak tyngka sha ki bahaiing jong kiba khlad bad 50,000 tyngka sha kiba mynsaw lyngba ka Prime Minister’s National Relief Fund.
Na ka liang ka sorkar Telangana pat ka la pynbna ba kan ai ïa ka bai luksan kaba long san lak tyngka sha ki bahaiing jong kiba khlad ha katei ka jingjia. Ïa kane la pynbna da u Symbud Myntri Rangbah ka jylla, u Bhatti Vikramarka hadien ba u la wan peit ïa kitei kiba khlad ha jaka buh metïap jong ka Osmania General Hospital.
Ha kajuh ka por u Myntri Rangbah ka Jylla u Revanth Reddy u la bthah ïa ki ophisar ba kin pyrshang katba lah ban pynbiang ïa ki lad jingkyrshan sha kitei ki lanot ba kynduh ïa katei ka jingjia ba sngewsih.
Na ka liang u Myntri ka sorkar pdeng u G Krishan Reddy u la leit ban jngoh ïa ka jaka ba jia katei ka jingjia bad kular ruh ban ai ïa ki jingïarap katba lah na ka bynta kito ki longiing ba shah ktah.
