Shillong, Naitung 03 : Ki la don haduh 101 ngut ki briew kiba ïabit thymmai ïa u khñiang jingpang COVID -19 ha kane ka sngi Balang kaba pynlong ïa ka jylla mynta ban poi haduh 696 ngut ki nongpang ha baroh kawei ka jylla. Ym tang katta, ha kane ka sngi la don ruh iwei iba ïap na ka daw jong katei ka jingpang ha East Garo Hills District.
Kitei ki 101 ngut kiba ïabit thymmai ki kynthup ïa ki 40 ngut na West Garo Hills, 13 ngut na West Jaiñtia Hills, 24 ngut na East Khasi Hills, 7 ngut na South West Garo Hills, 6 ngut na Ri Bhoi, san ngut na South Garo Hills, lai ngut na East Jaiñtia bad mar iwei na East Garo Hills, Eastern West Khasi Hills bad South West Khasi Hills. Ha kane kajuh ka sngi, ki la don 80 ngut kiba koit ba kynthup ïa ki 30 ngut na West Garo Hills, 25 ngut na East Khasi Hills, 11 ngut na South West Garo Hills bad kiwei kiwei.
