Nongpoh, Nohprah 22: Uwei u rangbah u la duh noh syndon ka jingim hynne ka step katba 3 ngut kiwei pat kila mynsaw jur hadien ba kawei ka auto rickshaw kaba don ïa u Registration Number ML 10 B 6460 kaba ki shong kala kylla khongpong ha surok bah National Highway 6 haka shnong Umsaw Nongkharai.
Katkum ka tyllong khubor naki pulit la ïathuh ba katei ka jingjia kala jia haka por kumba 8:30 eiei mynstep katba kitei ki 4 ngut ki dang thmu ban kiew shaka thaiñ Quinine, hynrei namar ka jingpynher sted u nongñiah katei ka auto um lah shuh ban tehlakam ïa ka auto haduh ba kan da kylla khongpong syndon.
Ha katei ka jingjia uwei u rangbah ba la tip kyrteng kum u Bah Stom Siangshai, 37 snem ka rta na ka shnong Pahamriniai, u la khlad noh hajuh bad ïa ka met ka jong u, la pynkit noh sha ka jaka buh metiap ha Nongpoh Civil Hospital na ka bynta ban pyndep ïaki jingdonkam katkum ki kyndon aiñ, katba ïa u nongniah bad lem bad ar ngut kiwei pat kiba la mynsaw ha kane ka jingjia, la pynkit noh sha Umsning CHC bad ka jingtohkit halor katei ka jingjia ka dang ïaid shakhmat.
